任睇No.1
  • 20º
  • 92%
  • 2023年3月31日 星期五

曾智華 - 一鑊泡、影都冇|祿祿無窮

昨天早上如常步入茶記,嘩!乜事?晨咁早已聞到火藥味!

原來班的士大叔在「問候」人,大大聲嗌破喉嚨,究竟搞緊邊科?點解唔冷靜地開《城市論壇》各自理論?

一聽之下,哦哦哦,明晒。相信佢地絕對代表萬計職業司機心聲!

肥佬伯:頂佢頭槌,邊個做運輸署署長㗎,搞少少嘢都搞到一鑊泡?喂,收幾十萬一個月喎,犯咁多低級錯誤?簡簡單單出個「車輛貼」都亂晒大籠,真係Hello Hong Kong嘞!

排骨叔:喂喂,佢都認晒衰啦。不過,真唔明,香港著名公務員質素優秀(聲氣似在潤人),效率冠絕全球,整乜呢劑嘢可犯上:前期準備不足、欠缺全面宣傳、「司機卡」供貨不足、電腦程式不完善、承辦商寄標貼出現銜接問題、「彈弓手」收費服務要延期。

以上6項,唔係我老作㗎,係運輸署署長羅淑佩親自承認㗎。各位,乜呢個「車輛貼」政策好似複雜到嘔咁嘅呢?有冇人畀個理由我,點解搞到甩轆成咁?

我一邊歎奶茶一邊聽佢哋呻。慘㗎,職業司機日日呢度去嗰度去搵食,煩到佢哋,當然冇面畀兜嘢噴你啦!

說來,小弟也是無奈的受害人,1月10日收到通知,聲明5個工作天收到車輛貼(見圖)。唉⋯⋯收鬼收馬咩?
曾智華

hd