世事的發生，有的有科學根據，有的冇！總之，冥冥中有主宰，絕非純粹巧合咁簡單，而用常理，就更是無法解釋得到！
講個實例。「樂壇教父」Uncle Ray，一月離世，享年98歲。
Ray叔生前契仔眾多，個個對佢無盡感激。點解？因佢真係成個慈父咁（聽節目時，佢低沉磁性充滿溫暖的聲線，大家一定感受得到），見人就幫，由60年代開始，凡遇上有音樂天份年輕人，例必扶一把，但絕冇希望當然更冇要求回報，毫無私心。當年受過佢恩惠者，冇一個會忘記，個個成名後，皆一再表示對Ray叔的感恩。
眾契仔之中，以「唱片教父」鄭東漢及「永遠的民歌王子」區瑞強最具代表性，兩人一再公開表示：「沒有Uncle Ray，就沒有今天的我！」
鄭東漢乃鄭中基之父，60年代香港首席結他手，70年代開始專攻唱片，捧紅大量天王巨星，旗下包括最頂級（70、80年代）的譚詠麟、張國榮、鄧麗君、王菲、溫拿、Beyond、陳慧嫻……為人腦筋精密，市場觸覺敏銳，營商策略高明，至今，香港唱片界仍無出其右。
鄭東漢喜歡養馬，在美國擁有牧場。不少旗下馬名字都與音樂有關。
近年有一隻，改名Uncle Ray，正是向契爺致意。此馬從未勝出，但神奇，就在Ray叔出殯前，突然大發神威在奧克蘭馬場爆大冷，一蚊美金派17蚊！你話係咪顯靈呢？（本專欄將改為逢周五見報）
曾智華
;){kind=link}
;){kind=link}
;){kind=link}
;){kind=link}
;){kind=link}
;){kind=link}