曾智華 - 點解乜都falling down?|祿祿無窮

好討厭「長他人志氣,滅自己威風」,不過——錯就要認,打就企定。唯有承認自己有問題,才有機會修正改過。

小弟兒時有首街知巷聞英國童謠,也曾改成廣東話,叫《有隻雀仔跌落水》,原曲是《London Bridge is Falling Down》。 背後典故要推到遠古時代,由羅馬帝國開始一直有不同掌權者希望在泰晤士河(River Thames)興建倫敦橋(London Bridge),不過在興建及維修期中條橋冧過幾次。而呢首民謠,正是要來「窒」呢條曾經是「豆腐渣」的歷史建築。

今日腦中彈出呢首歌,不由自主唱起,點解?因為,慘情。發覺雖然我哋想大力催谷——Hong Kong Is Back,但一廂情願係冇用的,必須尊重事實,痛定思痛查找不足,再立下決志去改善。

首先是香港國際機場,曾幾何時,威風八面,名列全球頭三位,令香港人引以為傲。如今呢?唔知點解(其實不少人心知),不停在排行榜上falling down。小弟好想知機管局有乜感受,對咁跌法,查找到甚麼原因?另外,香港人的幸福指數,更大大鑊!10年前開始,中央領導人已再三叮囑特區政府,要為香港人製造「幸福感」。講完,有冇實現呢?不但冇,最新聯合國《世界幸福報告》,香港更似撻生魚,撻到82位,死未?
曾智華
更多文章