曾智華 - 陳南祿新馬「唔使買」|祿祿無窮

喂喂,有冇咁變態呀,將隻馬名改做「唔使買」?騎騎,當然唔係啦,而係,隻馬狀態有排未得,寓賽於操,故此可以慳返!

邊隻?正是馬會上一任主席陳南祿隻新馬「天地同欣」(圖)!此馬剛剛來港一年(即老陳養馬費快邁向100萬喇 ),一直操,操到去年11月曾經報名出賽,結果好搞笑,當時我望望個電算機,唔係「化」,127倍?即係……

果然,隻馬根本不知競賽為何物,在騎師蔡明紹左右開弓猛推之下,仍無法跟得上主馬群,最後300米,已經投降,終於包尾過終點,輸近19個馬位!咁狀態,點跑?練馬師徐雨石收埋再操,4個月過去了,試閘狀態仍冇大進步。

好,咁就放佢出賽畀壓力,希望提升狀態。

即係點?即係又唔使買啦吓嘛。

換轉其他馬主,見隻馬咁,可能會好谷氣。不過陳南祿生性豁達,長期打英國佬工(太古/國泰),具有英國人傳統幽默感,對生活中一切負面嘢,都可以攞嚟自嘲。

例如去年7月在觀塘PK(仆到直),口部落地,門牙飛脫,我見到佢,仍不失搞笑本色,由仆低到入急症室求醫過程,非常卡通化形容。服晒!

「天地同欣」馬名很正能量,英文也佳,叫Seize The Dream。小弟一定會買10蚊雞——位置!
曾智華
更多文章