郭志仁 - 一念之差|九宮格

千禧後年輕戀人,跟大部份情侶一樣,經常為瑣碎事爭吵,例如男友討厭女生穿白色波鞋,因為她從來不清潔鞋面,白波鞋經常變黃變黑。女生最討厭男友的口頭禪:「到時再決定!」由食飯、行山、拍拖活動,男友都拖至最後一刻,女生則相反,樣樣事情需要先安排好。

女友喜歡奈良小鹿,兩人訂好機票酒店向大阪出發。女生規劃好所有行程,比旅行團更仔細,每日起牀時間、那裏吃早餐、乘搭那一班JR等等。女友問男生意見,男友一貫作風:「上機先傾啦!」女友大怒。

經常提醒朋友,兩人起火冒煙時,其中一方最好主動離開現場待大家冷靜,否則最傷害的說話就會衝口而出。

男:「你呢啲天蠍座,霸道控制狂,我就嚟窒息!」

女:「咁得啦,你搵個同你一樣,咩都懶懶閒嘅人去日本囉!」

男:「好啊,不過唔該你畀返機票同酒店房一半錢。」

女:「點解要咁益你!我會照去,自己租過另一間酒店!」

雖然年輕,男生還懂得冷靜的藝術,對戰前已離開案發現場,到海旁走一走,否則以上對話定必成真,分手收場。之後男友主動道歉,更建議:「我哋每人拎一萬蚊,由今日開始到成個旅程,邊個發一次脾氣,就扣一千,發多過三次就扣晒。」

兩人在日本不斷IG放閃,回來送我奈良名物春鹿純米大吟釀,也告訴我這個故事。猶如電影《緣份兩面睇》(Sliding Doors),一念之間,一步之差,都會改寫人生。

「若然當日鬧鐘不懂呼叫,若然當日電梯死火三秒,這樣能令當天改變有多少」鄭伊健—《緣份兩面睇》
郭志仁
更多文章