潮談——完場結果仍未final

  足球有句諺語:「一日未完場,一日唔知結果」,用來形容賽事變幻莫測,就算領先,都有機會最後一刻給對方反勝,因此勉勵大家縱使處於下風,亦不要輕言放棄。

  周六之前,我碰到最應驗這句話的一場比賽,是二○一七年歐聯十六強賽事,巴塞隆拿對巴黎聖日耳門。話說首回合巴塞作客輸4:0,次回合主場,到了八十六分鐘,巴塞仍只是領前3:1,我見比賽差唔多夠鐘,陷入僵局,巴塞若要出線就要再入三球,心想大局已定,而明天又要一早上堂,於是索性關掉電視,返房瞓覺。不料,一覺醒來,查看賽果,眼鏡都跌埋,在最後七分鐘(比賽補時五分鐘),巴塞竟連追三球,兩回合合計反勝對手6:5,締造了「驚天逆轉七分鐘」!足球賽事之變幻莫測,「一日未完場,一日唔知結果」,又一鐵證。

  但原來足球是可以神奇到一個地步,就算吹雞完場,一樣唔知結果。話說,周六在家看曼聯作客白禮頓,直到八十九分鐘,曼聯仍然領先2:1,但卻被對方在九十分鐘頭槌追平。曼聯心急反撲,但眼看為時已晚,最後一擊給對手護空門,球證吹雞完場。見到大局既定,索性離座去廁所,想不到卻峰迴路轉,球證走了去看VAR(視像裁判),發現原來白禮頓球員禁區內犯手球,結果就算已經吹雞完場,球證都補給曼聯一個十二碼。費南迪斯主射入網,結果改寫為2:3。

  這可能係史上首次,球證吹雞完場但結果仍未final。足球賽事之變幻莫測,讓人永遠津津樂道。但願這也可以給在逆境的朋友,一點鼓勵和撫慰。

蔡子強


hd