《蜘蛛俠：跳入蜘蛛宇宙》，先後於洛杉磯、紐約網上影評人及芝加哥影評人協會獲選為最佳動畫，又得到金球獎的最佳動畫提名，入圍奧斯卡完全無問題。電影屬Sony電影公司首齣《蜘蛛俠》動畫作品，網上零負評，美國著名影評網站爛番茄更給予100%好評。的確好嘢，電影意念新鮮畫面極靚，正邪對碰都可以咁好玩。我無收錢，無拎着數，一個字，要入場。
生活喺布魯克嘅平凡O靚仔Miles有日發現自己突然可以喺大廈外牆行走，唔知點算好之際，因意外而歸西嘅蜘蛛俠Peter Parker肥爆現身，原來係來自另一次嘅Peter B Parker，仲話要教Miles做守護城市嘅蜘蛛俠。因為邪惡奸角金霸王利用超級對撞機打開時空門，令身處其他時空，同樣擁有超凡力量嘅蜘蛛女Spider Gwen 、Spider-Man Noir、Peni Parker及Spider-Ham一齊現身，意念超有趣。「究竟呢個世界有幾多個蜘蛛俠?」Miles成頭黑人問號。英雄，從來不止一個，熱烈歡迎史上首位非洲裔「蜘蛛俠」Miles，啪啪啪啪啪。
向經典漫畫風格致敬
電影最令人睇到嘩嘩聲係超強烈的視覺風格，超出觀眾對CG動畫的期望，同時又向原著漫畫的經典風格致敬。動畫製作是一絲不苟的過程，例如畫師要花一個星期去繪製四秒動畫，而由於本片要把CGI和人手繪圖天衣無縫地融合，每位畫師要用一個星期才繪製到一秒的動畫。此外，本片的分鏡數量比一般動畫電影多兩至三倍。
對動畫電影全新體會
《尋找小腳八》及《LEGO電影》系列監製Christopher Miller說：「有時畫面會分割成一格格，好似睇漫畫咁，有時又會用快速閃幀(Flash Frame)嚟呈現特別嘅構圖，全片都有新嘅音效及風格化嘅視覺，令你好似置身喺漫畫入面。」簡單嚟講，觀眾散場後會對動畫電影有全新觀感。（剛上映)
撰文：廖思慧
;){kind=link}
;){kind=link}
;){kind=link}
;){kind=link}
;){kind=link}
;){kind=link}