頭條戲場——《勁舞Dancing癲》給天真的人摑了一巴

  由台灣時代力量立委林昶佐擔任主音的閃靈樂團,因入境處指他欠缺「特別技能」而拒絕向其批出來港工作簽證。你以為唱吓歌,唔會同政治拉上關係?你太天真了。正如電影《勁舞 Dancing 癲》中的北韓O靚仔盧景修(都敬秀飾)是韓戰戰俘,因為鍾意跳美國嘅踢躂舞而被同胞排斥及歧視,「你不理會政治,政治也會找上你」。

  電影由《陽光姊妹淘》的姜炯哲導演執導,韓團EXO成員D.O.都敬秀主演,後生仔為部戲剃頭又要苦練六個月踢躂舞及學習北韓方言,演繹民族英雄個細佬寸得嚟有啲思想,招積態度可愛得嚟唔太乞人憎,唔係EXO粉嘅我表示開始幾鍾意佢。

睇你禁得幾多

  電影背景發生於50年代因韓戰期間建立的巨濟戰俘收容所,新上任的美國佬所長為O氹上頭開心,又希望得到記者讚賞,派黑人下屬,原是百老滙踢躂舞者的 Jackson (Jared Grimes 飾)搵有潛質戰俘組成踢躂舞蹈團,於是無啖好食又有成屋家庭成員要養嘅楊芬麗(朴惠秀飾)、擁有一身好舞功的中國人小胖(金珉熩飾)、鍥而不捨尋找愛妻下落的癡情漢姜炳三(吳政世飾),加埋全收容所頭號搞事份子盧景修組成雜牌軍「Swing Kids」,雖然國籍及語言完全唔夾,但眾人為實踐夢想日練夜練,就算畀美軍挑釁,畀同胞排斥甚至燒晒啲舞鞋兼毒打,都一定要去做。

  舞蹈編排好出色,戰爭內容點到即止,感動加搞笑及輕量勵志,結局殺我一個措手不及。(1月3日上映)

撰文:廖思慧


hd