頭條戲場——《小丑回魂2》睇極都有驚嚇

        2017年的《小丑回魂》勁收得,全球創下7億美金票房佳績,拍續集是常識。電影改編自驚慄小說大師史提芬京的經典暢銷名著《IT》,監製芭芭拉慕式提表示:「小說超過1,100頁,第一集大概只交代到300頁內容。」電影絕對是第一集嘅加強版,嚇鬼你內容會更驚嚇、專恰細路嘅惡小丑潘尼懷斯嘅變身更多花款,同埋最重要嘅係,留意番片長169分鐘,睇極唔完,嚇極都有。

上集講到七個廢柴聯盟擊敗小丑後以血立誓,如果有一日邪惡嘅小丑回歸,眾人定必重聚兼將隻死嘢置諸死地。27年後,小丑又現身,仍留在當地嘅黑人同盟成員通知已搬離成長地,無聯絡好耐嘅盟友,召喚眾人返歸再打大佬。

  片長169分鐘講啲乜?導演好細心,逐個解構同盟成員嘅過去,包括一直無透露,發生喺1989年夏天嘅事,填補咗成人廢柴們缺失了的記憶。導演解釋:「《小丑回魂2》係27年後長大成人嘅廢柴故事,佢哋要尋回極之重要嘅記憶。如自己嘅初心,以及眾人之間嘅深厚友誼。」

  第一集榮膺史上最賣座恐怖片,續集驚嚇度及密度當然加強,亦更為血腥,其實睇到幾攰。衰格小丑下場如何當然唔會劇透,但中心思想同《回魂夜》好似,都係唔好盡信眼前狀況,唔使驚總之揸緊個信念,鬼都奈我哋唔何,記得Keep住「成盤係血當佢無事」嘅宗旨做人,壞人一定有報應。

(剛上映) 撰文:廖思慧


hd