頭條戲場——《陽光兔仔兵》糖衣包裝下的悲劇

        電影去年在多倫多電影節中奪得觀眾票選大獎,是真正的人見人愛,然後是一眾頒獎禮如英國電影學院獎、金球獎及奧斯卡等提名,成績表非常巴閉。電影以男孩視角審視二戰的殘酷,鬼馬加荒誕,奇幻又悲傷,屬反戰喜劇。首次演戲的小男主角JoJo( Roman Griffin Davis飾)將盲目崇拜納粹德國兼情竇初開的十歲小男生演到上晒身,那種尷尬加疑惑加唔知點算加發現曾經擁抱嘅人如此邪惡,非常可愛。(上映中) 撰文:廖思慧

        十歲O靚仔JoJo被二戰時期的納粹德國洗晒腦,擁有一顆熱血愛國心非常崇拜希特拉,童年夢想係加入希特拉青年團,因為太過崇拜而幻想咗一個只有佢睇到嘅希特拉出嚟,兩人亦師亦友,善良嘅JoJo好信任呢位虛構的偶像,但相處耐咗覺得好唔對路。

  一個家庭,不同政見注定多問題,同情猶太人嘅係JoJo嘅強悍媽媽Rosie(Scarlett Johansson飾),有一日被納粹黨洗腦嘅JoJo唔覺意發現阿媽收埋一個猶太少女Elsa(Thomasin McKenzie飾),晴天霹靂唔知點算,最後發現一直被灌輸嘅猶太人等於邪惡並非真實,世界從此變得美好。

  電影中的靈魂就係小男主角JoJo,導演Taika Waititi為尋找可以能夠駕馭對納粹德國有盲目崇拜同時又情竇初開角色嘅演員,走遍紐西蘭、澳洲、英國、加拿大、美國及德國,睇咗超過1000個小朋友嘅試鏡影片,最終搵到11歲的英國男孩Roman Griffin Davis。導演對佢讚不絕口,覺得佢對演戲充滿熱誠,更發現佢有超越同齡小孩嘅專注力,「佢可以將憤怒及焦慮等複雜嘅情緒,融合到幽默嘅演出之中,根本係JoJo的不二之選。」最後那隻JoJo同Elsa的自由之舞,又甜又趣,正義必勝,睇到我會心微笑。

hd