頭條戲場——《無定向喪心老友記》耆英爆Seed保家園

  《無定向喪心老友記》係2019年阿根廷全國票房亞軍,亦代表阿根廷出戰金球獎最佳外語片。電影翻拍自76年阿根廷經典cult片《Yesterday's Guys Used No Arsenic》,刪減Out咗的情節及主題,保留原作的瘋狂黑色幽默及懸疑元素。由三個Uncle演員加一個Auntie演員孭飛,全部影帝影后級,因為對白夠Mean,串人鬧人直插入心,好笑夠毒超鍾意,片長129分鐘,完全唔覺。(剛上映)撰文︰廖思慧

  布宜諾斯艾利斯郊區有棟鄉郊大宅,入面住咗四個人,分別係曾經光芒四射嘅女星Mara(Graciela Borges飾)、佢個廢柴老公即前演員Pedro(Luis Brandoni飾)、狠辣導演Norberto(Oscar Martínez飾)及惡毒編劇Martin(Marcos Mundstock飾),後兩者同Mara以前合作無間,亦同Pedro好老友,三個雄性耆英每日釣魚、打獵同打桌球過日辰,悶咩?咁退休係咁㗎啦!

陌生人當然要小心

  咪以為有錢又有大屋住好好,其實Mara一直頂唔順老公嘅兩個死黨。一日,一對幾靚嘅年輕男女「闖入」四人的生活,當然呢個「闖」字唔係咁簡單。一直都話,有陌生人失驚無神對你好,九成九有蠱惑。然後Mara「驚覺」自己個名仲係好響,旁人歡呼吶喊搞到佢唔想再匿喺枯燥大宅同三個臭男人共度餘生,決意賣屋兼復出,三件雄性耆英決心捍衛佢哋嘅樂土,多場正邪食腦攻心計大鬥法展開,睇到我係咁笑出聲。

  電影屬舞台劇式喜劇,劇本過癮,解構人性好到肉,一個演員都唔識,但睇得好開心。


hd