布宜諾斯艾利斯郊區有棟鄉郊大宅,入面住咗四個人,分別係曾經光芒四射嘅女星Mara(Graciela Borges飾)、佢個廢柴老公即前演員Pedro(Luis Brandoni飾)、狠辣導演Norberto(Oscar Martínez飾)及惡毒編劇Martin(Marcos Mundstock飾),後兩者同Mara以前合作無間,亦同Pedro好老友,三個雄性耆英每日釣魚、打獵同打桌球過日辰,悶咩?咁退休係咁㗎啦!
陌生人當然要小心
咪以為有錢又有大屋住好好,其實Mara一直頂唔順老公嘅兩個死黨。一日,一對幾靚嘅年輕男女「闖入」四人的生活,當然呢個「闖」字唔係咁簡單。一直都話,有陌生人失驚無神對你好,九成九有蠱惑。然後Mara「驚覺」自己個名仲係好響,旁人歡呼吶喊搞到佢唔想再匿喺枯燥大宅同三個臭男人共度餘生,決意賣屋兼復出,三件雄性耆英決心捍衛佢哋嘅樂土,多場正邪食腦攻心計大鬥法展開,睇到我係咁笑出聲。
電影屬舞台劇式喜劇,劇本過癮,解構人性好到肉,一個演員都唔識,但睇得好開心。