改編自荷里活編劇 Matt Naylor的劇本，由百想視帝劉亞仁及朴信惠主演的《#ALIVE》蟬聯三周韓國票房冠軍，香港人唔使戴住口罩入戲院睇，仲可以食住嘢歎住睇，因為Netflix已上架。劇情簡單節奏快速，最緊要犯駁位唔多，同樣賣喪屍，我覺得好睇過《屍殺半島》，仲要係幾多O添。撰文：廖思慧
喪屍片其實來來去去咁上下，見到喪屍要走，未見到喪屍要避，睇導演功力有幾強，可以將避同走拍得驚險又有趣。《#ALIVE》講述首爾突然有不明病毒，感染者全都會眼出血行為怪異，最後仲會變食人喪屍，但呢隻喪屍同一般我哋睇開嘅喪屍唔同品種，因為呢隻中咗毒後會Keep住十幾廿分鐘正常，呃到好多人，你以為佢冇事，原來唔係，所以病毒傳播極快，一個大屋苑唔使一個鐘九成人中晒招。
唔好驚頂住呀
男主角吳俊宇（劉亞仁飾）好鍾意打機，打打吓發現屋苑有喪屍入侵，匿喺屋企咪唔驚囉，但冇水冇電加上冇晒食物，一係走一係等死。孤軍作戰廿日諗住自我了斷之際，男主角發現對面公寓有另一位倖存者金宥彬（朴信惠飾），兩人全靠抱住「一定要活下去」的堅強意志先捱到然後再一齊逃離「喪屍公寓」。因為喪屍入侵場景喺屋苑，感覺好貼近，邊睇邊諗吓發生喺自己身上會點處理，緊張之餘仲要動吓腦筋，成件事幾有意義。
;){kind=link}
;){kind=link}
;){kind=link}
;){kind=link}
;){kind=link}
;){kind=link}