專欄

頭條戲場 - 《殺手列車》勁暴力爆血動作喜劇｜頭條戲場

頭條戲場 - 頭條戲場 2022-08-06 列印

電影改編自伊坂幸太郎的日本懸疑推理小說《瓢蟲》，由《殺神John Wick》系列監製兼《死侍2》導演David Leitch執導。講述地獄黑仔王殺手「瓢蟲」（Brad Pitt飾）要登上列車執行任務，發現全車有6個殺手（計埋佢），個個各懷鬼胎。一套睇到好忙嘅戲，我指對眼好忙，事關由頭打到尾，又刀又劍又槍又炸彈又拳腳，超強爆血度，仲要好好笑，加埋出色配樂，爛番茄新鮮度得59%，我覺得唔使理佢囉。
撰文：廖思慧

因為想為老婆報仇，邪惡黑幫大佬「白死神」（Michael Shannon飾）度埋啲屎橋，將覺得有關嘅殺手安排上列車等佢哋自相殘殺，但冷不防有位「細膽又純情」嘅少女Prince（Joey King飾）搞搞震，誤導呢個又整鬼嗰個，列車周圍都係血，死法新奇之餘配上粉紅色吉祥物Momomon梅花間竹咁出現，cute中帶血，都幾治瘉。
要乜有乜睇到好爽

導演表示執導此片最大的挑戰是：「點樣喺一個規範嘅空間（一列子彈火車內），拍出一部緊張刺激嘅動作電影？」所以一向創意澎湃嘅導演發揮小宇宙，高質展示殺手們點樣喺子彈火車的餐卡內廝殺、在靜音車廂中埋身肉搏、又喺狹小的洗手間內槍口對決。電影有大量動作場面，笑點亦非常多，劇情轉折位一隻手數唔晒，角色之間好似好關事但其實又唔太關事，雖然角色眾多，但導演節奏上拿捏得好，理解力低嘅人都絕對睇得明。

特別讚好柑桔（Aaron Taylor-Johnson飾），未見過有人做衰格嘢可以咁有型，客串巨星相當驚喜。