筆泰沖動——旅遊達人何去何從

  疫情持續了接近兩年,會否進入第三年都冇人知。疫情中好多行業的從業員突然之間失業,空少、空姐、酒店老闆、Spa老闆……總之涉及到遊客消費的都一定受到影響,莫講一些「自作業」的旅遊達人。

  沒有正式統計過市面上的旅遊達人今時今日去向如何,只知道項明生James去了台灣繼續拍他的網片,周奕瑋都仲有TVB份工,至於其他的有些轉行,有些更已消聲匿跡……慶幸自己所有資訊都是來自泰國,而自己又住在泰國,兼且一直以來所涉及無論新聞、旅遊、樓盤、美食都與泰國離不開,所以疫情之中還有少許收入,現時每天從不習慣,變成已經習慣了安在家中拍片放上社交平台。

  無論是泰國的便利店美食、疫情新聞、泰國鬼故事等等,總有一瓣可以攞來講,當然收入及開心程度絕對不如以前,但「木馬也要去繼續轉圈」,點樣都要繼續生活,所以好地地就由旅遊達人變成一個專拍片在網上分享的人,幸好還有大家支持,訂閱人數和收視率也算OK。現時每天的生活,就是每日早上起身有如當年做亞視睇真D一樣搵料(以前係睇報紙,而家就上網睇),搵到做完資料搜集之後,便在家中Set好腳架,自言自語自拍再出片,食完個簡單早餐又繼續搵料,跟住又在屋企再拍第二條片,下午來一個家中下午茶,然後又再拍多一條片,叫外賣食完晚上休息,每天如是生活。是充實的,但就沒有出去街上拍外景那麼多姿多采。

  期望疫情可以盡快過去,一切可以回復正常,希望有一天所有旅遊達人可以回歸,再在一些旅遊達人頒獎禮上喜相逢!

胡慧沖


hd