胡慧沖 - 曼谷最熱門酒店|筆泰沖動

今時今日曼谷最熱門的酒店可說是The Standard, Bangkok Mahanakhon,剛剛開始試業讓顧客入住的這間酒店,雖然未至於日日爆滿,但講到酒店內的餐飲地帶,Booking則要排到三個月之後,十分誇張!

所說的餐飲地帶,包括地下上一層的卅二公館,以及最高一層室內的墨西哥餐廳OJO。卅二公館作為過江龍有幾威猛唔需要多講,正式開業日子正是明天,但據說Booking已經要等到三個月之後才有枱。之前說過很多泰國人去香港都一定會到這間食肆捧場,今次開到來泰國,一眾泰國食家又怎會輕易放過呢?

至於另一間,以前是屬於KingPower集團旗下吃法國菜的餐廳,但現時改為酒店擁有,最大賣點就是透過落地玻璃可望無敵靚景,有大地在我腳下的感覺,而且消費滿1,000銖便可以免費上去觀景台睇靚景,食一餐價錢雖然比街邊海南雞飯貴,但亦有好多泰國人慕名而來,因為環境裝修都十分之精采而大受歡迎,Booking同樣要三個月後先有位。

一中一西、一高一低這兩個餐飲地帶,就令到The Standard這間酒店站穩陣腳成為傳媒焦點。現時香港入境隔離已經放寬為3+4,無形中亦鼓勵香港人出外旅行,據知很多人正打算到泰國旅行,估計這間酒店日後可能會成為香港遊客一個熱門打卡地方,加上坐擁這兩間無敵餐廳,無論本地或海外顧客都可以吸納到,絕對是一石二鳥!
胡慧沖
更多文章