胡慧沖 - 泰國旅遊仍安全?|筆泰沖動

最近有關泰國的事情眾說紛紜,更有消息指出遊客在街上會被帶走,甚至有些媒體說千萬不要去泰國,不過根據香港政府8月26日公佈,基本上在41宗「賣豬仔」案中,39宗涉求職被誘騙,1宗涉網上情緣,1宗仍在調查中,卻未有發現涉及旅行中途被擄走的案件,之前流傳的謠言可說不攻自破……

新聞歸新聞,每天都會有新的發展,在事情曝光的第一天網傳很多新聞,有段時間的確人心惶惶,個個以為去完商場行出嚟就會被人擄走,甚至乎一出機場就會出事,搞到我都要講句,如果大家太擔心就暫時唔好到來……點知一傳十十傳百,就變成「胡慧沖叫大家唔好去泰國……」老實講,如果真係咁危險,我相信我和好多居住在泰國的香港朋友、日本朋友、韓國朋友都一早已經走咗,但眼見不但沒有人因此離開,反而仲多咗好多朋友到來,這個就是事實!

其實小弟剛剛從清邁回來,眼見當地市面情況一切如常地熱鬧,也有很多中外遊客在街上購物旅遊,曼谷就更加唔使講。無可否認事件中係有害群之馬聯同一些壞人,把到來求職的人帶走,但好地地一個外國遊客,如果不是因為求職陷阱,做乜要帶你走呢?這些邏輯有人明白,也有人不明白,但根據在香港機場工作的朋友所講,往泰國旅遊的人次並沒有因此而減少,似乎大家對泰國依然有信心。
胡慧沖
更多文章