糖果屋——抵食雞髀包

  今時今日,走進中高檔的麵包店買一個麵包,閒閒地都要十多元,有的甚至更貴。早前見有過江龍麵包店,一個牛角包索價二十多元,依然人龍不絕!香港人很對飲食要求果然高,為了食,從不吝嗇荷包。

  不過想食平靚正包點,都不乏好選擇,好像位於粉嶺的一家地道麵包西餅店,便滿有驚喜。他們售賣各種傳統麵包之餘,不時有創新款式,早前我就試了只售$8的原隻雞髀包。餐包看上去平平無奇,有點像一個槌仔,原來麵包內裏包着原隻滷水雞髀!雞髀當然不是超大隻,但肉質嫩滑,雞肉醃得夠入味,食落還有點甜,原來雞髀配麵包可以非常夾!而且麵包中和了雞髀的鹹,比起單食雞髀更滋味呢。麵包小小一個不算大,但非常飽肚,細食的女生甚至可以當正餐,而我則剛好作為下午茶。平日買一隻雞髀也超過十元,可見這雞髀包CP值有多高,難怪成為店中熱賣產品。

  想食到平靚正的包點,大家不妨多穿梭舊區,甚至橫街窄巷。可能你會說,很難為了找尋一個麵包而專程去某地方,但如平時發掘多些美食據點,經過的時候順道幫襯也不錯。有時也不是為了慳錢,而是食得超值那種滿足,比單純慳到錢開心得多!

糖妹

hd