金融High Tea——強勢股 宜低吸

  G20月底召開,陸羽仁預測市況會隨著中美談判消息波動,好友、淡友隨時一齊被大鱷祭旗。話口未完,國家主席習近平確認會喺峰會同美國總統特朗普會面,美股即時大升,受貿戰低氣壓影響的港股彈力更大,淡友喺急升下傷亡慘重。

  美國總統特朗普喺峰會前出口術要求開會,中方一直無回應,但周一中國突然透露習大大會去北韓,呢個不尋常舉動反映事態有微妙變化,因為特朗普一直想喺北韓核問題上有所作為,中方呢個時間去訪問,唔排除係想做說客,增加同美國談判籌碼。果然,中國隨後確認習大大會出席習特會,美股應聲彈高。

港交所炒新股王登陸

  習特相會,究竟後事如何呢?有中環茶友經過教訓,唔敢對會面期望太高,笑言特朗普今次殺完好倉,稍後見面可能「玩嘢」,皆因大鱷會沽定貨再殺「淡倉」。特朗普作風反覆,這個相信中國都有預期,又唔肯承諾全盤接受美國條件,你願意開先開,減低特朗普喺見面「玩嘢」空間。兩國呢次見面,估計最理想都係搞出一啲共識,然後重啟談判,一次過達成協議機會不大。

  至於講到特朗普會唔會變臉,陸羽仁唔敢太樂觀,但比茶友估計好小小,主要係內地做咗美方再加3000億美元貨品關稅準備,長期應付貿戰。若然特朗普真係撕破臉皮,實行加徵關稅,咁中國就會捱落去,同時推出一系列措施刺激經濟,但當中國工廠要走的走得七七八八,適應加稅後,美國要同中國再傾,難度就會增加,所以隨住特朗普開始總統選舉工程,佢嘅話語權就會減低,所以要把握時機。

  從投資策略上,特朗普作風難以捕捉,無人可以講得準,投資者能夠做的就係計算值博率,如果個市未升太高風險就低,若然個市升近29000點,高追就要留意風險。

  喺中美元首確認將會喺G20會晤消息刺激下,港股連升三日,收復二萬八關。恒指高開726點,報28224點,一舉升穿250天線,其後升幅收窄至523點,低見28022點。午後指數上下游走,收市前再度向上,全日急升703點,報28202點;國指收報10764點,升257點。大市成交熾熱,全日成交急增至1051億元,是5月28日以來最高。

  藍籌股近乎全線向好,騰訊(700)領升大市,收升4%,報347.2元;友邦(1299)曾升至80.05元,創一個月新高,收升4.3%,報80元,為全日表現最佳藍籌之一。港交所(388)再升2.5%,報277.8元,阿里巴巴今年第三季可能掛牌,由於股份喺美國交投活躍,登陸後估計成交有可能超過股王騰訊,有望推動港股交投增加。雖然港交所昨日股價未明顯跑贏大市,但放長一段時間睇就屬於強勢股,相信新股王登陸嘅利好因素未來仍可維持一段時間。

  近期新股上市其實幾多,日照港裕廊(6117)昨日以上市價1.5元於主板掛牌。股價高見5.51元,最後飆升1.67倍。收報4元,為今年截至目前為止首日上市表現最佳新股;不計手續費及佣金,一手帳面賺5000元,為今年截至目前為止,賺錢第二多新股,僅次於日前上市的瀚森製藥(3692)的10480元。

  另一隻強勢股港鐵(066)仲勁,一度高見51.95元,創歷史新高,收市升幅收窄,升1.6%,報50.7元。港鐵唔係爆炸型選手,升得急就會消化下。大升市下湧高引發回吐,有心坐呢架車可以等回調吸納。

高追物管股慎防中伏

  物業管理股都有數隻股份創新高,中海物業收報4.13元,大升8.4%,創歷史新高;碧桂園服務(6098)亦創上市新高,一度高見17元,收報16.86元,升1.1%;永升(1995)收購青島雅園物業管理55%股權,股價曾高見3.85元,同創上市後新高,但收市倒跌,報3.46元,跌1.1%。由於呢個板塊強勢,股價處於高水平,急升後就會惹來回吐壓力,高追就有機會吃眼前虧。

陸羽仁


hd