金融High Tea——中海宏洋賣樓報佳音

  12月雖然係基金埋數日子,但今年港股投資經理似乎放軟手腳,可能大家覺得今年本地發生多年不遇嘅社會事件,成績麻麻都有理由交代,毋須出力推高大市。美股聖誕假前造好,屢創新高,平安夜前稍為回落唞唞氣,杜指調整36點報收27864點,假前公佈經濟仍然強勁,總統特朗普就搶報佳音,話會同國家主席習近平簽貿易協議。

  放假期期,A股變化不大。本地兩日長假,市面仍然有衝突,雖然狀況唔算太惡劣,除咗部份鬧市,生活大致正常,但始終會影響聖誕消費市道。從美港兩地投資氣氛睇,本地因素仍然發揮壓抑作用,恒指始終受制二萬八關,假前輕微低收42點報27864點,國指亦跟隨走收造11035點。長期前夕市面氣氛仍充滿張力,投資者好多都無心戀戰,提早離港散心,成交奀奀只有319億元,今日已經係今個星期最後一個交易日,相信大市好有可能都係炒炒個別。

大市有機會炒炒降準

  國務院總理李克強周一表示,將進一步研究採取降準同定向降準、再貸款同再貼現等多種措施,以降低實際利率同綜合融資成本,推動小微企業融資難融資貴問題明顯緩解。市場人士估計,李克強打得開口牌,好可能喺明年初內地就會降準,消息對內房股係好消息。

        雖然內地繼續高舉「樓係用嚟住,唔係用嚟炒」的旗幟,但近月房地產市場回暖,若然內地降準,內房板塊應該有機會受惠,短炒一個方向就係跟住賣樓數字找尋目標,似乎用呢個方法嘅股民亦唔少,所以近日賣樓報佳音嘅中國海外宏洋集團(081)表現相當強勢。中國海外宏洋主要股東是內房藍籌中國海外(688),公司前身老牌公業股蜆殼電器。蜆殼電器早年已喺深圳投資中信廣場等房地產,2005年收購咗光大房地產公司70%股權。2009年,中國海外收購蜆殼電器,發展為主攻二、三線城市同買入其他房地產公司嘅業務單位。現時中國海外持有38%股權,蜆殼前大股東翁氏家族仍然持有13.5%股權。

        今年,中國海外宏洋賣樓127億元,較去年同期增長14%,盈利18億元,每股盈利增長近70%。截至9月30日止嘅第三季,營業額已達107億元,經營溢利29.7億元。根據公司公佈,10月份集團實現合約銷售額58.84億元,涉及銷售面積50.42萬平方米,分別按年增長70%及8111月份合約銷售額55.34億元,按年增長97%;合約銷售面積44.85萬平方米,增長99%。今年首11個月,累計合約銷售額568億元,按年增加16.9%;合約銷售面積451.75萬平方米,增加17.2%。

        隨著業績同賣樓數字公佈,集團股價明顯轉勇,假前收市報5.17元,接近今年高價之餘,同時逼近兩年前創出嘅高價5.8元。中國海外宏洋現價歷史市盈率7倍,息率2.75厘。由於賣樓大增,今年盈利應會報佳音。該股主力經營二、三線市場,加上市值只有177億元,在內房股中不算一線公司,估值要打折扣,但發展策略會相對靈活,加上大股東中國海外支持,可視為快炒降準嘅目標。

破底股炒開有人跟

        生意淡薄,股民都想博一博,一啲曾經破底嘅半新股都見有投機。破底後挾番上招股價嘅中國飛鶴假前收報9.05,微升0.4%。由時代中國(1233)分拆嘅內地綜合物業管理服務供應商時代鄰里(9928)上市訂價5.15元,雖然掛牌日大市氣氛不俗,股價仍難逃破底。該股公開發售部份超額認購只有9.6倍,一手1000股中籤率35%,招股價介乎4.23元至5.8元,最後只係中間落墨。掛牌後最低曾到過4.52元,假前有回勇跡象,報收4.89元,升3.4%。破底股炒開有人跟,股民可能覺得現時落注平過申新股,仲可以見到勢色不對隨時落車。

陸羽仁


hd