金融High Tea——恒隆老闆英雄之見

  港股不跌則已,一跌驚人。大市連升七個星期,累積升幅不少,但本周兩個交易日就插近千點,昨日更勁跌810點,對好友打擊最大,殺倉意味特濃。

  大市乘內地疫情擴散恐懼急插,在此之前,陸羽仁聽到有超級富豪質疑今次升市唔係幾真,好有托高夾淡友味道。但現代經濟熱錢游資洶湧,股市上落究竟何謂真、何謂假,有時都分不清,只能問句誰為真假定分界。炒上時你質疑佢假,只係搵自己笨。

  但中環茶友話,到周一港股下插,當時解釋係同疫情有關,但睇返當時內地股市仲升緊。今次新冠狀病毒在內地爆發,但港股率先下跌。如果有留意,穆迪喺周一收市後才宣佈調低香港信貸評級,所以就算無疫情,個市會唔會照樣被人質低呢?

  股市要跌不愁沒有理由,疫情係突發因素,同一時間,信貸評級公司下調評級,以及主要股東抽水減持,就係人為事件。好似騰訊(700)主席馬化騰減持騰訊,就成為幾重利淡因素,嚴重震散港股。

騰訊股東鬥快食胡

  馬化騰喺兩年內再度減持,騰訊挫2.7%,收報385.4元。早前有老友話買咗騰訊,見到股價升破400元,心思思想食胡收割,結果小股東唔夠大股東出手快。騰訊之前有南非大股東沽貨千億元的405元關口,跟住又到馬化騰以398至401元沽貨。馬化騰沽貨金額只有20億元,與南非大股東減持數量相去甚遠,但暫時就成為股王心理關口。

  喺龍頭股受壓下,恒指失守二萬八大關,最後收報27985點,瀉810點,兩日累插1071點,並已完全蒸發今年累積升幅,跑輸亞太區主要股市。大市成交金額連續八日破千億,成交額達1328億元。

  50隻藍籌股全線下跌,友邦(1299)跌3.4%,收報81.85元。其他股份方面,阿里巴巴(9988)跌2%,報215.8元;小米(1810)跌4%,報12.76元。不過,平安好醫生(1833)持續攀升,更曾創上市新高,高見68.35元,收報67元,仍升6%;花旗早前發表報告,認為平安好醫生食正內地潛在推出醫療政策,上調目標價兩成半至75元。

  成份股中,吉利(175)挫5.3%,收報14.06元,連跌第六日,為表現最差藍籌股。市場憂慮武漢肺炎擴散,令賠償個案增加,內地保險股全線下跌。眾安(6060)挫6.4%,收報29.35元;新華保險(1336)插5.6%,收報32.7元;中國太平(966)跌5.2%,收報18.64元;國壽(2628)插5%,收報21.1元;周一創新高的平保(2318)急回4.3%,收報94.4元。

內險濠賭股成重災區

  另一受疫情打擊板塊係濠賭股,市場擔心農曆新年旺季表現,美高梅中國(2282)插6%,收報12.94元;永利澳門(1128)跌4.8%,收報18.62元;新濠國際(200)、澳博(880)都跌逾4%。

  藍籌股全線陷落,恒隆地產(101)揀正昨日公佈業績,結果去年純利按年減少兩成四,股價即日下滑4.4%,收報18.24元。茶友笑言,業績倒退撞正大市急插,兩個壞消息一齊爆發,都算係跌得應該。如果以昨日大市回調幅度計,其實股價算係跌得少。

  茶友話,喺地產股中,恒隆過去一年表現算係較好,主要係公司無喺高位買香港地皮。相反,集團近年加重在內地高檔商場投資。香港不歡迎內地遊客,加上大陸將奢侈品關稅調低,未來本地高檔零售恐怕難再見高峰,恒隆所受影響會較少。恒隆董事長陳啟宗話,日前有內地朋友在尖沙咀逛街時,被「黑衣人」恐嚇,他說經歷動盪,「香港唔會陸沉嘅,有人賣樓,亦都有人買樓。」不過,香港零售業相信難以回復數年前的高增長,本港旅遊業需要長時間恢復,「甚至能夠恢復咩程度,我都打個問號」,真係同茶友英雄所見略同。

陸羽仁


hd