金融High Tea——銅芯口罩概念係「老鼠尾生瘡」

  港美股市喺四月反彈後,開始進入上落市格局,以觀望疫情變化。美國經濟半死,朝野共識係餓死不如病死,寧願承受爆疫死人的風險,都要開工做生意,但投資者不敢放手大炒重啟經濟,恒指就在24000點穿梭上落。

市值爆升10億炒味濃

  大市高位有回吐,低位有吸納,個別板塊有波動,在這樣的市況下,市場人士忽然發現成衣股晶苑(2232),原來係呢個星期大出風頭的銅芯口罩生產商,於是晶苑股份單日就彈高12.5%,收報2.25元。

  今個星期,政府話會每個市民送一個可重用口罩,首日就有200萬人登記,換言之呢張單至少有呢個數。晶苑接了這張單,坊間自然質疑有無官商勾結、利益輸送等。不過呢單交易是否真係咁好賺,可以即時谷高股價呢?

  呢個疑問其實有數得計,今次政府撥款8億元搞派口罩,按道理,相信政府會預計條數夠每個人都攞口罩。由於今次新移民和外傭姐姐都有資格申請,估計合資格人數要計足750萬人,以8億計即是平均每一個口罩成本要107元。

  不過,這絕非口罩生產商收到的錢。因為這8億元會包括行政費用,仲有派送口罩上門的包裝、運送成本,以至其他項目。今次政府送罩送到上門,不要以為郵政署幫政府派貨不收錢,由於郵政係以基金形式運作,政府一樣要找數,運送成本貴過造罩成本,一啲都不出奇。如果以一杯咖啡賣10元,咖啡生產商只有收到1元。

  晚上晶苑發表聲明,每個口罩收加工費1美元,即係成單生意不過幾千萬,以做六層的布口罩一個收1美元,真係有無錢賺都未知。但受消息刺激,晶苑市值就爆升10億元,可能係盈利的50倍,甚至100倍。從定單數目嚟講,呢宗生意只能算係大極有限的「老鼠尾生瘡」,但股價彈升,就遠超粒瘡的size。

  晶苑老闆係紡織世家,第一代掌門人羅定邦係當年四大配額家族之一,透過生產成衣同買賣配額,賺到好多桶金後投入地產,現時羅家開枝散葉,變成多間公司。晶苑集團近年發展快速,專攻新物料成衣等,承接不少國際品牌的定單,幾年前公司上市,股價一度炒到9元樓上,之後就反覆下跌。喺疫情打擊工業股下,最低去過1.7元,昨日收報2.25元。現時公司資產淨值2.97元,現價歷史市盈率5.4倍,息率5厘左右,算是不過不失,但如果因為接了一張單股價急升,咁本來想買現在都應該要等等。

  中環茶友笑言,喺疫情爆發初期,不少股份炒生產口罩爆升,結果高追就中招。現在晶苑接了銅芯口罩張單,有幾多錢賺仲未知(外界都有少少擔心係公益事業),不過外面講到好似發大財,有人乘機炒股,隨時可能執得仲多。

周大福分店人頭湧湧

  喺內地社交陸續回復下,海底撈(6862)其中一名控股股東,擬配售4700萬股股份,每股配售價33.2元,套現15.6億元,海底撈收報34.2元,跌2.6%。至於大市就跌穿24000點,收報23980點,跌156點;國指收報9764點,跌43點,成交金額866億元。

  港交所(388)公佈截至3月底止首季純利22.62億元,按年下跌13.3%,每股盈利1.8元,同時行政總裁李小加於合約在2021年10月底屆滿時不再續任,港交所收跌2.8%,報246.4元。

  本地零售股繼續炒寬限,周大福(1929)升1.4%,報6.5元。上幾日假期,有朋友經過荃灣周大福分店門口,見到人頭湧湧,不知幾熱鬧。佢睇住周大福間店由停業,近期復開拍烏蠅,到周日非常熱鬧,可能係市民開始出來消費,有嫁娶需求者湧去買金飾有關,疫情初定,消費股都有得炒吓。

陸羽仁


hd