靳門抽射——戰衣

  最近有位林姓的新進保險從業員在社交平台上,大晒自己花了四萬五千元,度身訂造一套意大利羅馬Brioni西裝,着得好唔好睇,見仁見智啦,以價錢來說不便宜,但度身訂造一套高級意大利西裝,十零萬司空見慣,所以林生不用強調價錢,否則給人一種過於炫耀的感覺。其實男人穿西裝就等如披上一套戰衣,因此用料同配搭,是凸顯其個人穿衣的品味及層次,否則只會被網民揶揄「着起龍袍唔似太子,將意大利品牌西裝着出幾舊水嘅味道。」

  既然西裝是男人的戰衣,必須小心選擇,意大利頂級西裝品牌Ermenegildo Zegna,是西裝中的「黃金甲」,賣點是簡潔而獨特的剪裁,每件用上頂級布料,一分一寸由裁縫精心雕琢,猶如對待藝術品般完美,連英國查理斯王子也鍾情於Zegna。而法國和英國西裝裁剪都有其獨特之處,但近年新冒起的紐約品牌Thom Browne非常深得年輕一代喜愛,它的西裝肩膊位是正方形、手袖和衣長比傳統的款式較短,手臂位置有標誌性的紅白藍三間,成功為簡約西裝增添一點色彩和獨有風格。

  筆者多年來一直支持德國品牌Jil Sander,質料好及手工精緻,款式低調得嚟又襟睇,雖然並非度身訂造,但剪裁適中,是不可多得的戰衣,可惜Jil Sander在港專門店數年前北移。筆者認為西裝不能單看價錢,重點是穿上西裝要有台型、氣勢同品味,才能壓場,當然配上一對Berluti皮鞋更加是如虎添翼,無得輸。

靳清松


hd