超人能量——度橋抗疫保生意

  疫情打擊,百業肅條。首當其衝係中小企,重災區係飲食業。

  食肆不想執笠,員工保飯碗,就要度計。

  窮則變,變則通。聖芳濟同學搞的濟記飯堂,面對逆境,都算處變不驚。立刻制訂抗疫攻略。

  首先,自我隔離十四日,即係停業兩周,目的減輕皮費,清潔消毒之後,室內環境重新擺設。大枱變細枱,枱與枱之間相距寬敞,符合政府衞生策略,避免客人近距離接觸,呢一招都係學戲院隔行賣票,睇戲無遮擋,又可防感染,真係良心企業,我們要學習。四五人一小枱,間隔闊落,安心之餘,更添私隱。人多訂枱,只限一晚一枱,絕不超過二十人。仲要隔日營業,做一日,休一日,人少菌少,點會有感染。

  同學多是執業醫生,堅持飯堂提供消毒搓手液,必備探熱槍,入門要填「健康申報表」。疫症雖可怕,借此提高食肆衞生意識,絕對係化危為機,好似飯堂的廁所,環境乾淨特別講究,備受大家讚賞。

  連消帶打,堂食生意不足,就搞外賣。推出外賣套餐,薄利多銷,係食肆酒樓唯一生存之道,以濟不出門食客。不轉型,只有死路一條。進一步,增強現金流,推出消費現金,買二千蚊,送三千券,眾師兄弟「唔食」都買票支持,以濟燃眉,令人感動。如成功申請政府支持的食肆的八萬蚊,人工和月租,暫保有拖無欠。

林超榮

hd