疫情一波接一波，搞到全港九飲食業都無啖好食，年尾向來係旺季，以為生意大翻身，可惜，二人限聚，六點禁食，無法放寬，只好望門興歎。
濟記同學搞的私房飯堂開業一年，遇強愈強，努力經營，外賣出擊，已經輸少當贏，送鼠迎牛，再邀「糕」手出擊，四糕齊發。
昨日廣邀師兄弟飯堂試吃，無不讚不絕口，蘿蔔糕入口香濃，因為有日本瑤柱加本地生曬臘味，再加手切蘿蔔粒，粗幼長短不等，口感一流。最精采，係蘿蔔糕點解愈吃愈入味，暗藏玄機，瑤柱臘味外層鋪上，內層也鋪一層，以防煎糕時，臘味粒甩掉，所以，愈吃下去愈好味。
陳皮紅豆年糕係我至愛，舊年賣到缺貨，今年更加搶手。大師兄珍藏的「二十八年陳皮」，今年又長了兩歲，應該三十年陳皮了。自家處理紅豆蓉，注入陳皮碎，散發陣陣甘香，不甜不膩，幼滑清新，有益健康。
這一晚，飯後甜品係馬蹄糕，薄薄煎片上碟，晶瑩通透，粒粒馬蹄，手切爽口，有助消化。食到又停唔到口。
芋頭糕向來較冷落，不過，我獨愛芋頭粗獷一面，特別「晾」胃。煎到黃金啡色起燶邊脆口就惹味。
今年各家各派年糕我試過不少，水準特高，各有風味，應該係疫情刺激，要收復失地，年糕係兵家必爭之地，各派糕手過招，市民留家抗疫有口福。
林超榮
;){kind=link}
;){kind=link}
;){kind=link}
;){kind=link}
;){kind=link}
;){kind=link}