香港美事——伊健開show全城效應

  鄭伊健一連六場《Along With Ekin Live Concert 2019》演唱會星期日晚在紅館拉開序幕,一眾fans熱情捧場,我都有去現場為佢打氣。

  伊健出道多年,拍過不少經典電影,《古惑仔》、《風雲》、《極速傳說》等等,絕對係香港人嘅回憶。距離佢上次紅館開show已有差不多七年,伊健今次concert嘅歌單讓大家十分滿足,《甘心替代你》、《一個為你甘去蹈火海的人》、《仍能情深愛上》、《直至消失天與地》、《誰可情深如我》……有老友同我講,基本上現場一響起前奏,大家已經知道係邊首歌,伊健一唱,成個回憶畫面即刻喺腦度係咁loop!

  當晚佢亦都大顯身手,喺大鐵環上表演倒吊同引體上升等高難度動作,臂力十足;快速旋轉舞台上大唱《極速》,我都見到好多fans喺FB放片不停回味。除此之外,佢大唱《古惑仔》時仲大戰機械人,加埋現場煙火,畫面精采。我知道佢早兩日嗰場表演不慎韌帶受傷,依然帶痛堅持演出,絕對係精神可嘉,希望佢可以早日康復。話時話,呢套機械人係伊健專程從日本運返來,真係唔簡單。仲有《全城效應》、《友情歲月》呢啲經典中嘅經典,唔使講啦。

  香港樂壇引領潮流,成就了不少歌手藝人;一部部經典港產電影風靡亞洲以至全球,本港娛樂文化以及廣東歌一直以來影響着整個華語社會。隨著西九戲曲中心上個月落成,啟德體育園亦將於今年動工,將來香港可以有更加多嘅表演場地,相信無論對豐富市民康樂文化生活,還是對業界以及香港娛樂文化產業發展來講,都係一件好事。

林建岳博士

hd