任睇No.1
  • 29º
  • 76%
  • 2022年6月25日 星期六

林建岳博士 - 欣宜六月紅館開Show|香港美事

疫情穩定,政府放寬社交距離措施,市面逐步復常,大家小心翼翼外出睇戲食飯,社會氣氛漸向好。唔少朋友期待實體演唱會重開,終於有得入去紅館睇番場show;事實上,踏上紅館舞台開show,對所有歌手嚟講,係夢寐以求。對政府早前拍板決定放寬表演場地觀眾入場人數限制,大家覺得好開心。

我們寰亞娛樂及東亞娛樂亦積極籌備將最好的show再次帶畀大家,下月焦點之一,係鄭欣宜(Joyce)再踏足紅館一連開三場演唱會。感謝大家踴躍支持,掀起撲飛潮,反應熱烈,我哋好快就決定喺未開售前加場,既回饋樂迷對Joyce的愛戴,也因演唱會人數放寬,俾更多觀眾入場。上周開始信用卡優先訂票,短短三小時就售罄。

我知道Joyce對今次演唱會好上心,每天花長時間練歌排舞,全力以赴、一絲不苟,務求以最佳狀態傾力演出。有一次Joyce同我講,演唱會取名《Between Us》,以及Poster特別呈現兩個不同風格嘅Joyce,背後有兩層特別意思,一係希望同樂迷分享一個「Keep it between us」嘅小秘密,承諾用音樂拉近同觀眾之間的距離;二係佢希望探索兩種極端風格之間自己嘅另一面,從幾年前的抒情風、悲情風,到近年好爆好霸氣嘅曲風,Joyce都期望自己更有突破。

近年歌唱事業屢創佳績嘅Joyce,連續兩年奪得不少女歌手金獎殊榮,唱功實力備受肯定,我同團隊有信心佢今次帶俾大家更多驚喜。最後,溫馨提示,演唱會期間大家記住嚴守防疫要求,戴好口罩,咁樣睇Concert就放心又開心啦。
林建岳博士

hd