新‧潮——疫下插曲兩則

  從不在專欄作私人申訴,不過,今回實在氣忿難平。疫情肆虐,大家盡量謝絕各式應酬,外賣醫肚係普遍做法。早兩日買上市公司大X樂外賣,回公司打開一看,吓?五十一蚊一份咖喱牛腩飯,只得兩塊合埋只有小兒拳頭大薯仔,及牛筋一「大」片。冇搞錯,全份就係得咁多!為何如此待客,個人推論可能有三個原因:第一,伙計玩老闆,想暗中趕走客人。第二:牛腩來貨價超貴,只能將貨就價。第三:食肆蓄意劏客。揀邊個答案,大家必心中有數。香港生活幾十年,從來未見過咁做生意。當下回心想,與其投訴,不如研究下該公司股票,呢隻飲食股咁好利錢,會否買得過?食水咁深或者係買入信號都未定。

  講到投資,澳洲新南威爾斯省有新猷。為保障疫情擴散下打工仔租客的利益,緊急通過法例,除非租客欠租超過六個月,否則業主不能把他趕走。實際效果自然係租客可以「合法地」拖租六個月。如斯保障打公仔的安排,自然引起業主不滿。因為不少業主靠穩定租金收入,再加部份的每月個人收入,去應付銀行按揭供款。租客利益得到保障,那誰來維護業主權益?雖說政府同時發出指引,着銀行與業主商討,進行債務紓緩安排,但始終打亂了業主原來的投資部署,反對聲音嘈得拆天。

楊振耀

hd