新‧潮——佢得唔表示你都得

  今年九月立法會選舉押後一年,係城中一個最熱門話題。坊間反對嘅口痕友最流行講法係,南韓同新加坡可以喺疫情之下完成整個投票程序。點解香港做唔到?就表面聽,立論似係無懈可擊,想深一層就知道這種推論好粗疏。成龍可以從三樓,徒手沿水渠,一直爬落地面,係咪表示你都可以?

  手頭上有新加坡當時疫情可作比較。新加坡七月十日投票。當地九日及十日,確診數字分別係一百二十五及一百九十一宗。情況表面睇比香港還要差。但都集中喺由醫護嚴格限制人員進出嘅外勞宿舍爆發,分別有一百零三及一百七十四宗。當地社區感染分別只有二十一及十六宗。未明源頭的分別係十一及八宗。從數字分析,與香港目前狀況,根本不可以相提並論。

  個人相信南韓當時疫情應該也在可控之內,否則政府冇可能甘冒爆疫危險,強行投票。當然投票日有嚴控疫情擴散措施自然少不了。之所以提供新加坡當時疫情數字,係希望大家唔好貪食「懶人包」,人講就信。唔單止對腦袋無益,傳多幾次就更多人信以為真。

  故而大家亦唔好太信我。登入新加坡政府衞生部網頁新聞資料欄,查看就一清二楚。

楊振耀


hd