商界講呢啲——登陸香港 日清迷最新打卡位 合味道紀念館 即將開幕啦!

        呢年冇得外遊,恨逛日本嘢到不得了!家陣日清食品為慶祝速食麵發明者安藤百福先生111歲誕辰,特別喺尖沙咀中港城建立咗間「合味道紀念館」,咁大家就可以止吓外遊癮!

  間館有成10,000平方呎,裏面仲有好多打卡位,仲設有三大體驗式工作坊,其中「穀物麥片工作坊」仲係全球獨家限定兼全新登場,喺度大家可以了解呢個新產品嘅誕生緣由同製作過程。當然工作坊唔少得嘅,梗係好受日清迷歡迎嘅「我的合味道工作坊」同埋「出前一丁工作坊」,參加工作坊嘅人可以親手設計食品嘅包裝同材料配搭,又可以喺館內探索品牌背後嘅小知識,唔單只我Cally like,真係帶埋姪仔姪女去玩至啱!

  聽日清公關大員講,呢個館係日清食品執行董事、董事長兼首席執行官安藤清隆先生,想透過館內以食品做主題嘅教育、娛樂同埋互動元素,能激發展觀者嘅好奇心,而且仲希望能成為香港著名嘅旅遊景點之一,佢仲話門票同正式開幕日期會遲啲話畀小妹知。咁有特色嘅地方,小妹真係好期待,好想快啲有得去啊!

Cally


hd