商界講呢啲——藝術美食 一齊感受法國文化

        今時今日冇得去旅行,真係好miss Bonjour!尤其到五月,事關每年香港嘅「法國五月」,都有好多藝術界享負盛名嘅藝術家同埋佢哋嘅作品嚟到香港,範疇仲包羅表演藝術、展覽、電影、時裝、設計同美食,實實在在將法國文化帶到香港,而且仲係亞洲大型文化盛事。今年喺疫情之下,大家都唔使失望,因為今次嘅「法國五月」首次同華懋集團合作,將會喺荃灣如心廣場舉辦法國傳統市集(由5月28號至30號),屆時仲會有獨特嘅法國美食同埋現場表演,而大家去到中環街市,仲會見到獨特嘅法國街頭壁畫藝術,小妹提一下大家五月份每個星期日,中環街市都會有各種精采現場表演,大家去到就可以感受到一次難忘嘅法國旅程!

  係度小妹透露多少少畀大家知,喺中環街市嘅壁畫創作係由法國街頭藝術家Elsa Jean de Dieu喺現場創作,Elsa喺2008年移居香港,今次嘅四幅大型壁畫創作,仲會表達華懋集團、中環街市同埋法國共享「多元共融」嘅精神。另外,令小妹期待嘅仲有由Fuloo Fuloo長笛四重奏演奏嘅Impression Française - Quatuor de Flûtes Musique(法國留影-長笛四重奏),Fuloo Fuloo係2020年成立,今次佢哋四位成員會以長笛樂曲傳遞好有法國風情、又輕鬆愉快嘅樂章。

其他值得留意嘅仲有La Sax樂團表演好有特色嘅色士風四重奏、Rhythm & Tempo為大家帶嚟精采嘅法國爵士樂踢躂舞表演、「做乜Jazz」嘅無伴奏合唱、綠葉劇團嘅人體移動裝置。所有表演仲係免費入場,想知仲有咩節目,可以掃描二維碼!而家因為疫情仲未可以出國旅行,不如就趁呢個機會帶埋屋企人,一邊嘆住美食,一邊享受最chill最地道嘅法國藝術啦!

Cally


hd