商界講呢啲|跳跳虎做主角 登陸荃灣廣場迎虎年 - Cally

今年跳跳虎終於擔正啦!荃灣廣場搞咗個「跳跳好運虎虎生威」賀年裝置,活潑可愛嘅跳跳虎同小熊維尼、小豬Piglet會出現喺L5空中花園嘅唔同裝置,小妹都好想去同佢哋打卡。商場布置得好有賀年氣氛,首先可以去有跳跳虎歡迎大家嘅「『虎虎生威』好運臨門」,跟住去地下擺咗跳跳虎頭像金幣嘅「如虎添億金幣陣」,吸吓啲財氣。「歡迎你!金虎滿屋」嗰度有企定定嘅跳跳虎同大家合照,隔離嘅「虎氣衝天行大運」有個鼓,可以畀大家同佢哋一齊表演擊鼓。另外仲有小熊維尼喺「人見人愛蜜糖罌」,見到都覺得好sweet啊!去到夜晚,不規則嘅吉星高照光影球會着燈,唔同顏色嘅燈睇落好壯觀!

商場仲有個跳跳虎主題嘅期間限定店,裏面有最近推出新年系列、香港迪士尼樂園獨家發售嘅限定精品,跳跳虎同小熊維尼、小豬Piglet都會換上可愛度爆燈嘅傳統賀年造型。小妹已經mark咗個shopping list,例如有「農曆新年米奇與好友罐裝曲奇禮盒」、「農曆新年跳跳虎揮春」,同埋迪士尼角色御守,可以買嚟送禮,又或者自己收藏都得,逛一圈實會買到心水!
Cally
更多文章