Cally - 社企民間高峰會11月辦國際研討會 跨界交流重建「疫後新常態」|商界講呢啲

疫情持續,市民生活及社會經濟有好大改變,要重新面對日後種種挑戰與機遇,第15屆社企民間高峰會喺11月24至27日舉行,主題係「全民啟動 躍變未來」,為大家探討喺唔同方向重建「疫後新常態」,積極推動跨界別合作,建構一個可復原及可重塑嘅社會和經濟體系。

今年一連四日嘅「國際研討會」請到超過70多位嚟自世界各地嘅專家、學者及商界代表擔任演講嘉賓,重新審視現有及創新嘅解決方案,組合及重整各項資源,服務唔同年齡層及界別,以探討民、商、官、學如何協作,共同應對社會、經濟、環境等方面嘅挑戰。

國際研討會及連串特色活動

Cally知道日前嘅啟動禮邀請到民政及青年事務局局長麥美娟擔任主禮嘉賓,為11月社企民間高峰會掀起序幕。麥美娟局長和社企民間高峰會籌備委員會主席容蔡美碧女士一齊主持亮燈儀式,並同步播放今屆活動嘅宣傳短片,寓意推動各界齊心協力躍變未來,共建美好社會。麥局長喺會上稱,特區政府會積極支持社企持續發展,並希望未來有更多有創意、有抱負嘅年青人加入社企行業,發揮「營商揚善」嘅精神。

大會主持人「糕點時光」創辦人及行政總裁李昕君女士和香港社會創投基金創辦人及行政總裁暨社企民間高峰會籌備委員會副主席魏華星先生聯同夢創成真Dream Impact聯合創始人兼首席推動者林之鴻女士及Dustykid聯合創辦人及Dustyland元宇宙召集人黃崇堅先生圍繞今年主題對談交流,分享社企喺「疫後新常態」下嘅挑戰與機遇。

藉住今次國際研討會,大會希望連結社會企業家、政策決策人、年青人、學者和商界等不同界別人士,共商創新方案。

今次為期四日嘅國際研討會將圍繞三大議題進行討論,包括「共益元宇宙:探索Web3的社會影響力」、「跨城聯盟:重塑未來工作模式」、「連結資源 復元創新」。此外,國際研討會仲有一系列嘅特色活動,例如第三日舉行嘅「社創青年峰會」著眼創新精神,畀新一代分享佢哋嘅創新點子和項目。主辦機構將喺今年10月8日舉辦嘅「Youth on Youth 社區嘉年華」發揮協同作用,致力培養年輕人成為變革者,達致永續發展嘅目標。

公眾登記參與

社企民間高峰會2022多項活動由即日起接受公眾報名參加,於10月31日或之前購票更可享有早鳥優惠,詳情請參閱:https://ses.org.hk/registration
Cally
更多文章