Cally - 東港城「花滿東港．玉兔迎福」和風櫻花園林 6大打卡位展現浪漫和風｜商界講呢啲
Cally
2023-01-07 00:00
字體大小
聽講東港城嘅室內花展會昨日開幕，小妹趁空檔專程入去睇吓。可能疫情放鬆咗嘅關係，見到人潮湧湧，好多人去買花。但係小妹就比佢哋夢幻粉色嘅新年裝置吸引住嘞。
當中最搶眼嘅首推「櫻」色園林，感覺就好似走入迷人嘅粉紅花海之中。行上粉紅拱橋仲可以一次過睇晒櫻花海同可愛嘅玉兔。
正中央嘅櫻木神社掛滿咗神社特有嘅注連繩與紙垂，象徵「神聖潔淨」，又有趨吉避凶嘅作用。神社後面係日式屏風，溫暖和諧感引入庭園，配上嬌美花卉點綴，帶來家庭和順嘅祝福。可愛嘅玉兔參照日本嘅「開運干支置物」設計，象徵住愛情運、事業運、健康運等多重祝福。最後去到神社入面嘅運轉乾坤九宮格，可以幫大家轉轉運。
東港城仲聯同Mikiki推出「花悅常滿」利是封，糖果色系嘅利是封分別將四大傳統花卉以清秀嘅和風拼貼元素呈現，加上以燙金、浮雕、和紙等多種手工設計，手感一流，The Point會員只要用800積分並喺場內即日以電子貨幣單一消費滿$100（非會員須單一消費滿$300）就可以換領利是封一包。
東港城第十七屆新春花展會
日期 新春花展會：即日起至1月21日
「花滿東港．玉兔迎福」新春裝置：即日起至2月26日
地點 將軍澳東港城一樓中庭
時間 新春花展會：上午11時至下午9時
「花滿東港．玉兔迎福」新春裝置：上午10時至下午10時
Cally
更多文章
