企業熱話——魔童:線上零售要贏在運輸

  魔童王維基做生意諗頭多多,嗰日小弟到浸會大學工商管理學院市場學系嘅策略營銷Strategic Marketing講座,香港電視網絡有限公司主席王生就係席上嘉賓講者之一,聽佢講將一個新產品要成功推出嘅策略真係要花好多功夫。以網上零售生意為例,除咗要整靚個平台,仲要喺送貨到客方面花心思,所以佢投資咗個貨倉自動化執貨系統,既可以精準執拾過萬件唔同種類嘅貨品,同時又節省人手及快捷,另外佢亦喺多功能運輸車隊埋手,令到每程車嘅使用性增加,兼且為咗方便啲客提貨仲開埋實體店等,呢啲都令到減省成本、增加客戶購物體驗之餘,對生意嚟講最重要仲係增加營業額!

  呢半場講座咁精采,其實當日嘅講座仲有半場係由嘉士伯啤酒香港有限公司前大中華總裁王克勤做分享,佢同大家講新產品除咗要有創意之外,時機都好重要,仲分享對佢發展影響甚深嘅藍海策略,聽完兩場講座之後,真係獲益良多!

Jacky哥


hd