專欄

企業熱話——前景蓬勃保險業中後勤爭住請人

企業熱話 - Jacky哥 2019-04-04 列印

　　一講起做保險，如果仲係諗住只有前線代理，咁你真係好唔了解呢行啦！其實本港保險業得以持續發展，背後一眾中後勤人員功不可沒！縱觀外圍市場環境同政策發展，保險業前景理想，中後勤職位更爭住請人。

　　小弟過去幾個星期介紹咗唔同嘅保險業中後勤專業職位，包括核保、理賠、精算、風險管理等，其實仲有好多其他職位如保險科技、審計、財務、市場推廣等。除咗範疇多樣化之外，呢行仲有樣吸引人嘅地方，就係有明確嘅晉升階梯，一般冇經驗嘅大學畢業生入行由實習生做起，2年後可升為主任，累積5年經驗更可晉升至經理，月入可達5萬。另外，現時「一帶一路」及「大灣區」嘅發展，勢必令保險業更蓬勃，對各類型人才需求有增無減！

　　政府近年大力推動保險業發展，投放資源為業界人士做培訓，提升佢哋嘅專業知識；另一方面亦做咗唔少公眾教育及推廣工作，希望公眾進一步認識保險業，吸引更多人才加入，令呢行可以健康地持續發展！其實保險係一門專業，無論你即將大學畢業或者想轉工，不妨考慮投身呢個既穩定又有前景嘅行業！