企業熱話——全港首創 恒生應用NFC手機提款

  科技係為人所需而服務,近排疫情下,數碼科技應用尤其被大家關注。好似恒生銀行,只要客戶透過已安裝嘅恒生個人流動理財服務手機應用程式,咁就可以遙距攞到分行櫃位輪候票,除咗顯示取得嘅票號,仲會有實時輪到嘅編號,咁大家就唔使喺銀行度等,見到差不多輪到至去分行都得,家陣有16間分布港、九及新界嘅分行有呢個eTicketing服務!大家唔使聚喺分行,減少人群聚集真係好!

  呢個App仲有手機提款功能,透過恒生全線約600部裝有近場通訊NFC裝置嘅自動櫃員機,按個鍵然後將手機放喺櫃員機NFC裝置上就攞到錢,真方便!仲有呀,恒生係香港首間銀行採用NFC技術提供手機提款服務,勁!

  加理上個月個App推出智能儲蓄規劃工具「Saving Planner」,自動連結和整合客戶嘅恒生戶口和信用卡賬戶,工具會自動將所有支出作出分類,咁大家對自己嘅開銷花費一目了然!恒生執行董事兼財富管理及個人銀行業務主管關穎嫺話,舊年使用網上銀行服務嘅客戶已不斷增加,所以創新嘅數碼銀行服務會帶畀客戶更具彈性嘅選擇。遲啲7月初,恒生設有eTicketing服務嘅地面分行仲會增至78間。目前恒生嘅數碼銀行服務,涵蓋大部分主要銀行及理財產品和服務,而服務渠道仲包括恒生個人e-Banking、流動理財服務應用程式和電話理財服務熱線。

Jacky哥

hd