企業熱話——打針送環球酒店免費住宿

  而家打針又有著數喇!為咗響應香港業界同社會推動2019冠狀病毒病疫苗接種計劃,帝盛酒店集團送出500份獎賞畀接種疫苗嘅市民,每份獎賞就係兩晚世界各地嘅免費酒店房間住宿,總值港幣120萬。免費酒店房間住宿將經由香港總商會安排抽獎同公布得獎名單。完成接種兩劑新冠疫苗嘅市民可以登記參加抽獎,仲有機會贏取有效期至明年12月底嘅免費酒店住宿,喺環球指定酒店免費入住。

  日本話晒都係香港人最鍾意去嘅地方之一,所以帝盛嘅合作夥伴Agora Hospitality Group為呢個活動贊助喺東京、大阪同金澤地區合共300晚集團旗下嘅免費酒店房間住宿。其他參與獎賞計劃嘅酒店仲包括中國內地、倫敦、馬來西亞同新加坡嘅帝盛酒店,同帝盛酒店品牌旗下首個度假村概念酒店Dorsett Gold Coast黃金海岸帝盛酒店,佢將會喺今年12月喺澳洲開業。唔單止咁,帝盛仲會贊助部分香港酒店房間住宿。就算政府對入境旅客限制生效期間,得獎者仍然可以喺帝盛旗下任何指定檢疫酒店進行隔離,或者留港度假。

  有資格參加計劃嘅市民,可以留意集團透過香港總商會公布【「種種」有賞IT TAKES TWO TO TRAVEL】計劃詳情。

Jacky哥

hd