• 2022年1月25日 星期二
  • 19º
  • 81%
  • facebook
  • Weibo
  • RSS

企業熱話——監警會提前瞻性建議 冀提升警隊服務質素

  《監警最前線》集集劇情精彩得嚟又帶俾大家好多實用資訊。小弟身邊好多人都話呢套劇集令到佢哋對兩層架構投訴警察制度,同埋監警會嘅工作加深咗好多認識!

  聽晚播出嘅最後一集,劇情講述一名「精神上無行為能力人士」涉嫌搶劫被捕,警方事後證實他有不在場證據,案發時身處復康院舍,因此將他釋放。其親人隨後投訴負責調查案件的警務人員,指控包括拘留期間沒有提供藥物,以及拘留時間超過48小時。監警會審核投訴警察課提交的調查報告時,仔細檢視所有證供同證據,後來再經過連番「出Q」(提出質詢),以及同投訴警察課多次詳細討論之後,終於改變咗部分調查結果嘅分類,同埋對違規警務人員採取嘅處分行動。處理完投訴個案就等於case closed?當然唔係啦!監警會仲有啲咩跟進工作呢?大家聽晚記住睇埋最後一集喇!



何謂「未經舉報但證明屬實」?

  小弟向監警會請教過,原來喺投訴人提出嘅原有指控以外,若果投訴警察課喺調查投訴個案,又或者監警會喺審核調查報告期間,發現被投訴嘅警員仲有其他與投訴相關嘅行為需要正視,一經證實違規就會追加指控並分類為「未經舉報但證明屬實」,還投訴人一個公道!



因應投訴個案提出改善建議

  今集劇情另一個焦點,就係監警會喺審核投訴個案期間,留意到警員喺處理精神上無行為能力人士嘅指引方面有不足之處,所以就住呢方面向警方作出咗一系列改善建議。劇中嘅委員同現實一樣,嚟自社會不同界別,例如法律界、醫學界、社福界、教育界等,佢哋憑住專業知識同豐富經驗,提出咗好多務實建議,例如同社福界就相關議題緊密合作,以及加強培訓前線警員,提升佢哋喺處理精神上無行為能力人士時嘅技巧同敏感度等等。警方亦都好積極咁回應監警會嘅建議,迅速作出咗一系列改善措施,當中包括推出「守護咭計劃」,同埋訂立「行為指標」,協助前線警員識別精神上無行為能力人士,盡早了解佢哋喺溝通同醫療方面嘅需要。

  話你知啦,原來監警會自2009年成為獨立法定機構以來,就日常嘅警務工作已累積向警方作出咗超過180項改善建議,涵蓋範疇相當廣泛。除咗上述就處理有特別需要人士嘅建議,仲包括交通執法、應用資訊及通訊科技、如何加快調查失竊八達通卡嘅程序、檢討處理自動櫃員機拾獲現金嘅指引同程序等等,當中同我哋普羅市民日常生活真係可以話密不可分,透過呢啲具前瞻性嘅改善建議,長遠協助警隊提升服務質素。事實上,監警會作出嘅改善建議數字按年持續上升,再加上警方嘅積極優化工作,投訴數字喺咁多年來一直遞減。由此可見,監警會嘅工作喺協助警隊提升服務質素方面,成效顯著,碩果纍纍,亦彰顯咗我哋嘅兩層架構投訴警察制度更高層次嘅功能!

節目預告:

11月6日星期六晚上11點30分翡翠台(81台)播出,半小時劇集《監警最前線》。



Jacky哥

hd