任睇No.1
  • 21º
  • 65%
  • 2022年12月8日 星期四

Jacky哥 - 打工仔最想知:點先可以做少啲呢?|企業熱話

作為打工仔,試問邊個唔想做少啲、唔使做?最近同煤氣公司企業物料供應及行政總監李健明(Felix)傾計,佢有個好得意嘅工作理念就係:「如果你討厭手頭上其中一項工作,最好諗吓有咩方法,令你第二朝返嚟唔使做(呢樣嘢)。」

Felix從事採購同供應鏈工作已經超過30年,一畢業由倉務做起,每日諗點樣聽日返工可以做少啲。講起倉務,佢話當時公司規劃喺北角起一棟全新嘅煤氣大廈,嗰時佢同英國顧問去傾,幫手諗成個貨倉嘅設計同建造。

喺貨倉落成之後,Felix見到倉無電腦,就提議「不如整部電腦啦,做吓Excel都好嘛」,咁就開始將啲數入落電腦做紀錄。喺倉搬嘢太辛苦?佢就積極諗啲創新方法提升效率。就如近呢幾年,同事建議引入新型識跟住人走嘅「Follow-me鏟車」同「真空搬貨吸盤機」,仲有AGV自動分貨系統同手機應用程式等,令大家「用少啲力,做多啲嘢」。後來去做採購,要由內到外咁照顧成間公司嘅需要,小至幫同事採購文具、蒸餾水、咖啡豆;大至幫公司業務揀供應商,進口天然氣,甚至係煤氣管道,都由部門一手包辦。買公司物資就簡單啲,同供應商傾好物流安排同價錢之後,同事只要喺網上落單同收貨就得;買煤氣原材料就複雜得多,要睇吓邊度有原材料,價錢係現貨價定有數計,仲有應變措施、合約詳情等。依家仲多咗樣考慮─ESG(Environmental, Social and Governance)。以前大家出街買嘢,只着重價錢同質素,但近年亦開始會睇埋係咪認同商家嘅價值觀。煤氣公司都一樣,會考慮價錢以外嘅元素,當中最重要嘅就係供應商喺環保方面做成點。佢哋希望合作嘅供應商都會控制同減少碳排放,但每次向供應商攞環保表現數據都花唔少時間,有同事就提出用科技簡化成件事。於是,公司最新試用由SGS團隊開發、喺Microsoft Azure運行嘅平台─S-Carbon系統,鼓勵供應商上載同匯報碳排放相關資料。比較進步嘅供應商可以上載詳細資料,但一啲啱啱起步嘅,就可以簡單提供用電量同業務性質。平台會結合其他大數據,估算出唔同供應商每年嘅碳排放。

Felix話煤氣公司係亞洲地區第一間應用呢個系統嘅公用事業機構,當然想喺推動環保方面行得愈前愈好!呢啲就要靠同事不斷創新,大家齊齊做少啲,但做好啲!
Jacky哥能源百科面書專頁
能源百科面書專頁

hd