Shimba工作室——【環保藝術展現光芒】Market Play By Uncle Ray

        有賴社會各界嘅積極推動,環保已漸漸成為我哋生活嘅一部份,相信大家對環保 4R 概念都唔會陌生:減少使用(Reduce)、物品重用(Reuse)、替代使用(Replace)及循環再造(Recycle)。世界各地都有不少藝術家將棄置嘅物品轉化為充滿創意及美感嘅藝術作品,加上商業機構贊助及推廣,的確令公眾對環境污染嘅禍害及環保嘅迫切性有更貼身嘅體會!



        葡萄牙藝術家阿爾都善用被棄置街頭嘅物品創作大型動物塑像,從而吸引大眾眼球,透過它們來喚醒大眾嘅環保意識。同處於亞洲嘅泰國更將棄置物品升級再造成為一間寺廟。位於曼谷東北 600 公里嘅西薩菊省萬瓶寺就係由超過一百萬個回收而來嘅綠色和棕色啤酒瓶建造而成。萬瓶寺嘅建成,不但妥善處理好過百萬個被棄掉嘅啤酒瓶,更為環保界樹立一個新標竿 —— 將棄置物品變成一座建築物!



        其實香港亦不遑多讓,一個教育藝術兼備嘅免費藝術展「但願 - 光芒再現」亦剛剛開幕。呢個升級再造藝術展由本港知名建築師及藝術家陳麗喬博士策展,聯同十二位本地藝術家從舊物中共同構思創作靈感,製作出一系列作品,每件藝術展品背後都有一個主旨,希望啟發大眾對身邊事物嘅重新思考及醒悟,關注及參與環境可持續性嘅發展。展覽由 11 月 27 日至明年 2 月底,在荃灣如心廣場一期 2 樓 201 室免費開放予公眾參觀,俾大家可以喺聖誕及新年期間,投入藝術與環保嘅奇妙空間!

hd