Shimba工作室——【與疫同行】Market Play By Uncle Ray

世界各地疫情此起彼落,自 7 月起本地疫情爆發第三波後,港府隨即收緊限聚令至兩人及繼續限制市民之間的社交距離。本地各行各業為求「搵食」,只好各出奇招,靈活應對抗疫措施,適應新常態。(即使能夠如美國般開動印鈔機來個限量寬,由政府「出糧」俾市民,也未必全是好事)。

以餐飲業為例,唔少食肆喺晚市時段推出比平時更優惠嘅外賣菜單外,更陸續加入外賣平台,積極開拓外賣生意。而部分無法提供外賣嘅食肆如自助火鍋或燒肉店,亦轉向兼賣實惠嘅火鍋及燒肉材料,開拓市場。就連航空公司亦踩過界,推出外賣「飛機餐」來救亡!

可以借助網絡發展業務嘅公司更全力轉向,會議改以視像方式進行,積極開拓電子商貿,利用網絡及社交媒體嘅直播功能,喺網上銷售商品或分享公司最新資訊。一來可以保持公司嘅知名度,二來可透過即時嘅互動功能來跟客戶溝通,保持良好關係。

全面放寬抗疫措施看似遙遙無期,但與其望天打卦不如積極行動。如比較傅統嘅地產行業亦採用 AR 及 VR 技術,方便有興趣人士喺網上睇樓。一向依賴展銷會來推售海外樓盤嘅中介公司亦著力舉辦網上直播來分享相關資訊及搶佔眼球,喺疫情下繼續前行!

hd