任睇No.1
  • 18º
  • 79%
  • 2023年2月3日 星期五

助古仔開工作坊同後輩做練習 張繼聰激讚Edan冒死爆姜濤好勝事件

五年冇拍劇,近年主力拍電影的張繼聰,為了熱愛的籃球,及跟導演袁劍偉、MIRROR、ERROR等合作,決定接拍ViuTV劇《季前賽》,最重要跟新一代演員合作,可以了解年輕人想法令自己唔會out。講到同姜濤、Ian及Edan等合作,阿聰讚不絕口,仲大爆拍攝期間跟他們的絕密笑料。另又提到當年身處谷底時,得到前輩鼓勵,所以今日有能力都想幫新一代,故早前便替古天樂開班教導後輩,望年輕演藝人唔使行咁多冤枉路。 採訪:杜杜 攝影:譚志光
服裝:PETROLHEAD
阿聰自認是籃球癡,中三已沉迷,每日流連籃球場,就算入行後一樣狂打,「我十年前仲成日打波,啲表演賽,又有打地下聯賽,打到肋骨裂,又咬斷咗半條脷,都瘋狂㗎,要開工都打到周身傷,後尾拍劇先至停咗啫!」近年打籃球變成阿聰跟囝囝張瞻的親子時間,「阿仔以前唔鍾意打籃球,因為高度同埋未夠力射到個籃,o依家佢開始鍾意,係幾親子,有時兩個去打吓籃球射吓波咁都開心。」
同姜濤不停互寸幾開心

跟MIRROR及ERROR合作,有得掹車邊拍青春偶像劇,亦是阿聰接拍《季前賽》原因,「我鍾意睇佢哋傾偈,成班低B仔講埋啲低B嘢,有時聽見都覺得吹脹,佢哋真係好搞笑,睇到佢哋感情好好。」講到同樣是籃球癡的姜濤,阿聰認為他年紀輕輕,能夠有今日成績及可以面對壓力好叻仔,「佢處理得好好,仲係好謙虛、好努力、認真做自己工作,好畀心機去進修,呢啲態度好好。」阿聰又大爆姜濤跟他一樣好勝心強,「我哋一唔使埋位就不停鬥射波、鬥射三分,不停講嘢寸對方,令對方有心理壓力,佢當然影響唔到我,但係我就影響到佢,不停講嘢騷擾佢都幾開心。」
Edan為一個鏡頭不停練

阿聰跟Ian就傾音樂,兩人會研究吓寫歌,最令佢估唔到,對方竟有追看他演的劇集,「佢話讀緊大學時都鍾意睇《幕後玩家》,咁斯文鍾意睇呢啲,都煲劇喎!」阿聰跟不少前輩一樣都讚Edan聰明又勤力,「佢做好多嘢都好有sense,搞笑底,絕對啱拍喜劇,好有節奏感,累積吓經驗會更加好,同埋佢做三分神射手,有時要一shot直落拍攻勢再射入,佢好勤力,唔使拍就不停練。」而阿聰早在Stanley做舞蹈員時已認識,「佢有時都會同我研究演技,佢作為演員有心有力,好戥佢開心。」講到平時好癲的193,阿聰就睇到佢另一面,「大家可能見到佢狂妄一面,但係佢都有謙遜嘅一面。」外形有晒喜劇演員條件的肥仔,阿聰都覺得佢好搞笑,「佢個人反差好大,咁嘅身形,但跳舞又超勁、超靈活,仲好有喜劇sense。」
入古仔公司都想有貢獻

跟阿聰同公司的袁澧林(Angela)早前憑電影《窄路微塵》獲提名金馬影后,第一時間公開答謝他,更透露疫情期間阿聰曾開工作坊跟公司後輩做練習,「最初古仔(古天樂)叫我入公司,我係竄咗去,唔慣入大公司嘛!後尾知佢幫緊好多人,對電影圈係癲嘅,好值得尊重,決定入公司唔係有啲咩好路數,係諗有咩可以貢獻吓,但一入就lockdown,咪幫佢搞個workshop,嗰一年間歇搵白只幫手,又會搵啲電視台演員嚟同佢哋jam吓,我喺佢哋身上都學到嘢。至於Angela個case,最後係佢自己爭氣。」

阿聰特別關心新一代的心理狀態,因為低潮時曾受過前輩恩惠,「我純做歌手時,鄰居係黃日華,嗰時我啱啱結婚,有跟華哥去踢波,佢真係郭大俠,我係nobody佢都好上心。我最記得嗰時畀人寫到七個一皮,我呢啲阿茂阿壽喺TVB啲騷企到東南偏北,一個人好戇居,跟住蘇永康(阿公)同許志安走埋嚟同我講,『喂你頂住呀!佢哋又過份嘅寫到咁,冇嘢㗎,過到就得㗎!』我心諗你又知我係邊個,嗰時新入行一、兩年咋!」就算之後阿聰拍劇,都繼續撐佢,「阿公都成日tag我『我有睇,掂呀!』呢啲前輩喺我仲係細路仔時鼓勵我,呢啲好緊要,畀你知道經歷緊嘅嘢會過,我同新嗰輩傾偈都話,『你o依家覺得好大鑊啫!你睇我o依家幾跳脫,我嗰時咪又係咁大鑊,冇嘢㗎,唔死就得㗎嘞』,呢行係需要有啲咁嘅人喺度。」■阿聰最鍾意跟同樣好勝的姜濤鬥波,輸咗要做掌上壓。
■阿聰最鍾意跟同樣好勝的姜濤鬥波,輸咗要做掌上壓。
■阿聰讚姜濤年紀輕輕好叻仔,面對各方面都處理得好好。
■阿聰讚姜濤年紀輕輕好叻仔,面對各方面都處理得好好。
■阿聰跟《季前賽》台前幕後都合作得好開心,他形容這次是拍電影外的課外活動。
■阿聰跟《季前賽》台前幕後都合作得好開心,他形容這次是拍電影外的課外活動。
■首次入圍金馬影后的袁澧林,在IG公開答謝阿聰老師。
■首次入圍金馬影后的袁澧林,在IG公開答謝阿聰老師。
■阿聰跟古天樂合作電影認識,但最初對方邀加盟旗下他竟拒絕。
■阿聰跟古天樂合作電影認識,但最初對方邀加盟旗下他竟拒絕。
■當日蘇永康和許志安主動鼓勵,令阿聰好感動。
■當日蘇永康和許志安主動鼓勵,令阿聰好感動。
■阿聰讚黃日華好有大俠風範,好照顧新人。
■阿聰讚黃日華好有大俠風範,好照顧新人。

hd