任睇No.1
  • 18º
  • 75%
  • 2023年2月4日 星期六

解構《飯戲》成功因素 原班人馬拍續集 陳詠燊拎大綱向電視台Sell劇冇下文

導演陳詠燊(Sunny)執導的第二部作品《飯戲攻心》,票房衝破7600萬(截稿前),暫時穩守香港十大電影票房第二位,打破多項香港電影紀錄,他已有計劃原班人馬開拍續集。電視方面,Sunny首度監製及主持的ViuTV節目《導演•門》亦有口碑,更聆聽觀眾聲音,將未出街內容在網上播出。不過貴為7600萬導演都並非事事順利,他自爆早前向電視台叩門開拍電視劇,但得個傾字冇下文。採訪:杜杜 攝影:Stanley 髮型︰Anthony Wong
化妝︰Lisa C. Makeup Art服裝︰CLUB MONACO、New Balance Hong Kong

憑首部執導作品《逆流大叔》省靚招牌的Sunny,對於《飯戲攻心》再有佳績,他未敢自滿,認為關鍵是天時地利人和,「我近年好信緣份,演員又好投入去謝票,撞啱有好好嘅電影喺我哋前面上畫,令到大家對回歸戲院睇港產片有返個習慣,再加埋呢兩個月冇乜大嘅西片,天時地利,當然老闆同埋宣傳團隊好努力,亦都要我哋套戲本質上有一定成績。」
對子華瘋狂加分

《飯》片叫好叫座,Sunny有計劃原班人馬再合作,早前黃子華更收到他送的續集故事大綱作生日禮物,「我幾期望呢一套可以延續,難得儲到六位化學作用咁好嘅演員,而佢哋經歷呢一集同謝票,關係咁好,點解唔延續落去呢?當然大前提係個劇本要度得好滿意,度到一個新嘅形式可以重聚,而又好睇,我會認真度,如果又係一個景六個人,做咩要玩多次先?要有新衝擊,大家等吓先。」

眾所周知Sunny是子華忠粉,能夠跟偶像合作機會難得,而最可貴跟偶像近距離接觸後,不但冇減分而是瘋狂加分,「冇乜太多反差,所有嘢都好驚喜,之前我係完全唔識佢,我係好驚接觸偶像,有反差會好失望,子華神係好到呢,個人又nice,又尊重創作人,我哋溝通過程之中,互相信任程度好高,真係成隊crew都好鍾意黃子華,坦白講大家都係fans,另外五位演員都好尊敬子華神,但係佢嚟到大哥哥咁,令大家一齊傾偈一齊玩,好多樣嘢都好欣賞佢。」
想向陳可辛偷師

Sunny曾為編劇會等單位訪問過不少電影工作者,發現有一定吸引力,於是向ViuTV賣橋開《導演•門》,搵來兩代導演對談,是近年難得訪問幕後人的節目,有深度得來又不失娛樂性。Sunny坦認是自肥之作,「我上咗十堂補習班,每集錄成兩個鐘,剪得四十五分鐘出嚟,啲大導演又好唔吝嗇咁教你嘢,同你分享。」他每集都很喜歡,唯獨放棄做主持,跟師傅馬偉豪(Joe)接受訪問一集例外,「我講嘢多得滯,我幾想分返前輩三分二後輩三分一,但可能我同Joe交疊太多,佢講嘢唔多,有時講某件事答得精簡,而嗰件事我又在場,冇理由唔答埋,我剪片時都想剪走我一啲。」

在多位被訪前輩導演中,Sunny最想得到陳可辛指導,「覺得最近自己style嘅前輩暫時係陳可辛導演,我好鍾意UFO年代嘅電影,又係愛情、人物,嗰種輕喜劇,佢嘅風格係我仰望同跑緊去,再偷師捉住陳可辛導演可以傾幾日,逐套戲問都有排問啦!」原來好多《導演•門》觀眾覺得未夠喉,徇眾要求下Sunny打算將未出街訪問片段在網上播出。
冇信心拍電視劇

近年都有不少電影導演踩入電視圈拍劇,好似葉念琛、馮志強和袁劍偉等等,Sunny原來早前亦有計劃,「大約半年前有諗過搞劇,大綱都寫埋,有拎去電視台傾,但傾傾吓冇下文。」不過拍開電影的他又覺得未必適合拍劇,「譬如《飯戲攻心》拍出嚟兩個鐘,拍咗十八日,電影嚟講算係好少時間,即係用九日去拍一個鐘頭嘢,但係去到電視台可能係三個鐘拍一個鐘嘢,嗰吓取捨我暫時未識做決定,要拍快好多,但又要keep到質量,keep到好睇喎!我暫時未有信心去做,你叫我度劇嘅劇本可能有心機,拍可能會揦手唔成勢,而且如果搞劇一定會貪啲唔會得十集,至少十五至二十集,嗰個吃力程度又會高好多,我暫時未有信心去handle。」■能夠跟偶像「子華神」合作,Sunny覺得相當幸福。
■能夠跟偶像「子華神」合作,Sunny覺得相當幸福。
■《飯戲攻心》票房已超過7600萬,成為香港電影史上第二賣座香港電影。
■《飯戲攻心》票房已超過7600萬,成為香港電影史上第二賣座香港電影。
■拍《飯戲攻心》續集前,Sunny已率先創作舞台劇版。
■拍《飯戲攻心》續集前,Sunny已率先創作舞台劇版。
■Sunny在《導演•門》中,最唔滿意跟師傅馬偉豪出任嘉賓一集。
■Sunny在《導演•門》中,最唔滿意跟師傅馬偉豪出任嘉賓一集。
■Sunny認為較接近陳可辛導演風格,所以最渴望向對方偷師。
■Sunny認為較接近陳可辛導演風格,所以最渴望向對方偷師。
■Sunny拍第一集《導演•門》,搵來老友鄭保瑞和李子俊做嘉賓,當他們白老鼠來試。
■Sunny拍第一集《導演•門》,搵來老友鄭保瑞和李子俊做嘉賓,當他們白老鼠來試。
■Sunny兩套導演作品都有不俗成績,風格給人貼地感覺。
■Sunny兩套導演作品都有不俗成績,風格給人貼地感覺。
■Sunny大讚拍《飯》片期間,子華就好似大哥哥一樣照顧台前幕後。
■Sunny大讚拍《飯》片期間,子華就好似大哥哥一樣照顧台前幕後。
■Sunny領軍不斷謝票宣傳,成為票房創佳績其中一個原因。
■Sunny領軍不斷謝票宣傳,成為票房創佳績其中一個原因。
■做導演做到巴士都有Sunny個樣,都算威威。
■做導演做到巴士都有Sunny個樣,都算威威。

hd