姜文杰逆巿開公司拍電影 秦沛親自演出力撐

  秦沛(Paul)和姜文杰(Benji)首次以父子檔拍攝港產電影《大盜演》,今次更是Benji跟李璨琛等人成立製作公司的創業作,Benji亦身兼執行監製,身為爸爸的Paul哥當然要親身到泰國演出力撐。Benji坦言明白巿道低迷下開公司冒險,但仍想為這行業打氣及製造機會,Paul哥對囝囝的付出相當鼓勵。採訪:杜淑霞

  《大盜演》以一套爛尾電影開始,Benji坦承角色非爸爸演出不可,「爸爸個角色虛幻啲講,代表呢個行業咁多年嘅代表,我就代表入行冇乜機會嗰啲,所以有好多對白喺Paul哥呢個演員口中講出嚟,唔係對我,係對咁多演員嘅鼓勵。」Paul哥亦直言今次演出不是單純撐囝囝,「係想鼓勵呢行嘅從業員。」

  Benji坦承整個家族,由爺爺嚴化、嫲嫲紅薇,到爸爸和兩位叔叔姜大衛和爾冬陞都是圈中人,自己一出世已入了行,「真係冇得揀,我唔做呢行會瞓唔着。」Paul哥都直言,「佢喺UBC畢業,我都有問佢點解做呢行,好辛苦㗎喎!但我答應佢大學畢業,就可以追求自己嘅目標。」

  講到這個時勢開製作公司決定會否太冒險?Benji好感慨話:「自己前排情緒都好低落,因為音樂比電影更萎縮,我冇得喺台上表演,自己好唔開心,可能開家公司對我哋自己都係靈藥,一路keep住做,又幫到有志入行嘅人。」Paul哥都好支持囝囝決定,「鼓勵,食咗電影呢行飯咁多年,佢阿爺養大我,我就養大佢。」


hd