《造星II》失落三甲 女友力撐你是最好 魔音Tank原來想唱《今期流行》

  ViuTV真人騷《全民造星II》終於圓滿結束,大熱門Phoebus(吳啟洋)奪得冠軍,MC(張天賦)及Oscar(李祉均)分奪亞、季軍。賽前另一大熱及黑馬,29歲的Tank(梁德忠)與26歲JJ(范卓言)雖然輸咗但一啲都唔Sad,擁有一把地獄歌聲嘅Tank仲非常滿意Part 2唱跳《全日愛》部份,原來佢曾經想唱古天樂嘅《今期流行》,咦,反而想睇喎!JJ就自滿表示貼中三甲兼排名,仲話自己無理過分數,最緊要Enjoy。採訪︰廖思慧、杜淑霞

  去年因有工作被逼退賽《造星》的Tank,因心有不甘而捲土重來,而《造星II》節目播出而來Tank都是節目焦點,前晚總決賽中,Tank一開始便晒冷,Show肌同女友大跳限制級意淫舞蹈,全場嘩聲四起,而Part 2唱跳《全日愛》即時比下去,問Tank覺唔覺排錯次序?瘦剩個頭嘅Tank唔認同︰「想喺第一個表演有更大信心,所以就將最有信心嘅跳舞放前面。」



輸咗但快樂

  問到點解揀《全日愛》?Tank表示想揀一首快嘅廣東歌配合唱跳,之前都有諗過幾首歌,例如《今期流行》,Tank講歌名時感覺有啲唔好意思,咁尷尬咩?賽後檢討,Tank自評8.5分,因為參賽以嚟唱得最好嘅一次。對於失落三甲,Tank無失望,因為得女友力撐,「女友讚掂呀,話我今日表現最好。」阿Tank眼濕濕表示好窩心。黑馬JJ全程訪問笑笑口,因為佢好享受比賽嘅舞台,亦好滿意演出,特別係同「邊疆兄弟」合唱自己作品《邊Gang》。提到三甲,JJ得戚連講四次貼中晒,連名次都貼中,「Dance Battle完全為Phoebus度身訂造, MC唱歌有實力,而Oscar亦不得了,紅館式震憾演出。」


hd