男友Ricky化身解決師 周倩圯同店員講到「變臉」

  名模周倩圯(Samantha)自早年身體不適而停工後,幾乎絕跡公開場合,連社交平台都好少玩, 最新一個Po都已是5月中,陪形象指導男友郭慶彬(Ricky)蜜遊泰國。「神隱」多時,Samantha於本月初終與Ricky去銅鑼灣Shopping,她在服裝店內跟女店員一度講到「變臉」,好在男友及時上前拆解,果然「異性相吸,同性相距」,Ricky一出手就乜都搞點晒!採訪:梁志明

  近年深居簡出的周倩圯,除間中相約好友、家人聚餐外,更多的時間便是黏住Ricky周圍去,好似日前兩人就一齊去銅鑼灣行街。當日傍晚6時許,Samantha以眼鏡遮素顏,與男友儼如老夫老妻般,並肩行至百德新街某法國服裝品牌店。見做緊大減價,一件外套原價6千幾劈到近半,兩位潮人當然唔執輸,即刻揀番幾件靚衫去試吓啦,甫進店內,她即攻秋冬必備的羊毛長褸,好快便目及中一件卡其色大褸。而Ricky則拋低女友,一支公直上男裝部睇衫,試衫期間,他還拎出手機對鏡中的自己Selfie,之後托一托眼鏡睇真啲,似乎唔多啱心水,於是再換上一件格仔褸。

  另一邊廂,脫剩件黑白間條長Tee的Samantha手捧一堆衫,走向女店員問攞Size,點知講講吓,她忽然露出「蒙羅麗莎」般的詭異笑容,跟住又一時碌大對眼,一時又講到瞇眼嘟晒嘴,非常肉緊,此時,Ricky終於現身解圍,Samantha隨即變番小女人,企埋一邊等男友做「解決師」。結果搞咗1粒鐘,以為兩人一定滿載而歸,怎料最終竟然係冇幫襯,隨後便到附近餐廳撐枱腳。


hd