50歲敢於新嘗試 張可頤晉身製作公司CEO捧新人

        90年代TVB的當紅花旦郭可盈、黎姿、蔡少芬個個獨當一面,o依家全部上晒岸做咗索媽,生活幸福美滿。至於同期的高質「黃金剩女」張可頤(Maggie)都好架勢,近日她宣佈聯同商界女強人Laura合作搞製作公司,晉身CEO行列,已簽咗18歲脆卜卜華裔新人女歌手陳涵林,Maggie仲話唔排除力捧自己!榮升老闆的Maggie滿足地說:「50歲仲有突破,全因單身冇乜負擔。」採訪:方騫平

化妝:Gary Chung(張可頤) 髮型:Torry and May Lin

化妝:Meegan Seak(陳涵林)

髮型:Steve Shek @HAiR

場地:富豪九龍酒店

        「千禧年代TVB四大當家花旦」之一嘅張可頤攞過視后,亦患過抑鬱症,被逼停工兩年。2012年轉投港視,獲王維基封為「一姐」及「鎮台之寶」,近年張可頤養尊處優,產量唔多,只接喜歡的工作,如今年5月首次挑戰舞台劇《但願人長久》。最近她又一突破,就係染指商界,跟Laura學做生意,一齊開辦製作及經理人公司「涵耀星際」,擔任製作部的Production CEO,仲簽埋華裔女歌手陳涵林(Karen)。

勁讚新人有音樂天份

張可頤為支持公司第一位「親生女」,決定重開金口跟陳涵林合唱歌曲《風給的約定》(合唱版),計落自從喺2003年同馬浚偉幫TVB劇集《金牌冰人》唱插曲《情牽一線》後再錄歌。她說:「今次合唱幾新鮮,可唱出兩個唔同背景、年紀、環境女性心聲,唱到唔同味道。」原來呢位小妹妹陳涵林精通音樂來頭唔少,Maggie就勁讚她既有音樂天份,又勤力,而且有熱誠,她有感而發:「o依家歌手有talent未必有心,有心又未必有talent,有心有talent未必有機遇,其實呢個圈要百配。」現正於美國讀高中的Karen都想在香港發展,而她最愛「巨肺」G.E.M.(鄧紫棋),覺得對方同樣有唱歌天份。Karen又乖巧話兩個老闆都好好人,唔會鬧佢,似足一個家庭咁。

人生不停有轉捩點

50歲的張可頤Keep住做運動,所以身形好fit,問會否捧返自己,考慮吓性感演出?Maggie就搞爛gag反問:「係咪捧痰罐呀?呢個世界啲嘢又講唔埋㗎喎,其實我又唔敢開空頭支票話點點點,既然呢個世界有咁多可能性嘅話,試囉,做囉!但唔係講就做到,要機緣,只要啱自己,點解唔唱啫?亦唔會畀好大壓力喺唱歌方面。」成為CEO後,Maggie唔排除將來多啲做幕後策劃減少拍戲,不過公司有經理人部門,唔使她親自出馬管理,亦有機會物色啱嘅台前幕後合作。對於50歲先有人生轉捩點,她說:「只要肯把握同創造,人生係不停會有轉捩點,我嘅優勢係單身,改變對我冇乜負擔,咁我咪可以去實踐想做嘅嘢囉,50歲呢個年紀先有咁多突破,感謝神同我開路,我又開咗腦肯接受新事物啦,其實每個人際遇唔一樣,只要兩樣都開咗咪ok囉。」

hd