演《多功能》「Annie姐」獲讚 黎燕珊入TVB目標漸實現

        黎燕珊最近在劇集《多功能老婆》做朱晨麗的單親媽咪「Annie姐」,調皮鬼馬的演繹獲得不少讚賞,珊姐話好感激監製陳寶華發掘了她的喜劇細胞,她加入TVB的目標正一步步實現,希望未來能嘗試更多不同角色。現實中同樣是單親媽咪的珊姐自言跟角色一樣冇放棄到愛情,一對仔女還不時鼓勵她覓第二春。

撰文:杜淑霞 攝影:梁志明 服裝:FRAY I.D

        珊姐謂安排她演繹「Annie姐」最適合不過,「大家都係單親媽咪,好似戲裏面Annie姐咁太早結婚,亂咁識人,所以就生咗囡囡囉!哈哈!」珊姐仲透露跟演其囡囡的朱晨麗,因合作而成為好朋友,「我真係當咗佢係囡囡咁,佢話我係細佢媽咪一年,仲要橋到我個女又係做空姐。有次我知佢返鄉下,同佢講好鍾意食豆干,佢即刻買咗一大包畀我,真係好有心。」

屢敗屢戰

  加入TVB兩年多,珊姐自覺發展不俗,更講明唔怕辛苦唔使靚,最緊要有戲演,「高貴大方,成日都做,今次收到角色,我就知機會嚟啦!好想話畀人知,我靚得嚟都識做戲,多謝寶華姐發掘我喜劇嘅細胞,係開心㗎!呢段日子公司畀咗好多機會,連唱歌同行catwalk都試過,加入公司嘅目標同夢想慢慢實現。」

  講到一對仔女,珊姐謂他們好支持她工作,更鼓勵她覓第二春,「噚日阿仔先講,『我哋咁大個,你鍾意點都得。』阿女又成日趕我出街,又話『第時我哋結咗婚都唔想你咁悶。』我都想嘅,我會屢敗屢戰,雖然我創傷後遺症好嚴重,但係我復元㗎啦,差唔多埋口。(揀對象有咩條件?)唔使靚仔,人品好,同埋信仰一樣。」

hd