被港姐形象框住 向海嵐認難搵對象結婚

  向海嵐(Anne)最近首次參與ViuTV真人騷《香港親善小姐》,同一班前港姐楊思琦、譚小環和李綺虹等,分別去到韓國及日本參觀,順道分享參選帶給她們的感受。Anne因節目仲初次去到韓國首爾,更試了多個第一次,譬如同Oppa約會。Anne坦言欣賞韓國男仔暖男一面,但論外形就並非她杯茶,她更坦承參選港姐確實有影響她的情路,令45歲的她到現在仍是單身。

撰文:杜淑霞 攝影:李權威 髮型:Matt Chiu @ Xenter 首飾:Legacy Lab 場地:Party Huh

  首次踏足首爾,Anne除了跟楊思琦齊齊試着韓服同品嘗地道美食外,最難忘就是同當地Oppa約會,「韓國男仔高高大大眼矇矇,高大我都鍾意嘅,但眼矇矇唔係我嗰type,但係都幾窩心嘅,同我約會個男仔仲識少少普通話,都溝通到,有度我要着住短裙要坐喺樓梯度,佢即刻除咗件褸畀我遮住,真係幾gentleman㗎!」

揀對象重感覺

  談到參選港姐,Anne認為這個絕對是影響一生的決定,「真係好大轉變,冇參加嘅話我可能仲喺加拿大,唔知打份咩工好悶咁,唔會好似o依家咁多姿多采,試到咁多唔同嘅嘢,好似拍劇咁,就好似經歷唔同人嘅人生,所以參選係我其中一個最好嘅決定。」

  雖然港姐帶給Anne不一樣的人生,但同時亦影響了她的情路,「會諗人哋鍾意我係咪因為我藝人或者港姐嘅身份,就好似買個名牌手袋咁,定係真係鍾意我個人呢?我會多咗呢個顧慮。」不過,45歲的她仍唔心急搵另一半,「我又唔介意單身,又好enjoy喎!因為冇壓力,接咩工作、去邊度,都唔使同人交代,當然搵到個鍾意嘅對象,又唔會咁諗嘅。」一直有追求者的Anne坦承自己都幾「宅」,而揀對象就最重感覺,「最緊要大家相處到,感覺最緊要,對對象都會有要求,不過唔係條件嚟,譬如要對屋企人好、顧家、鍾意小動物,因為我鍾意狗仔,要有愛心。(靚仔?)冇所謂,合眼緣就得。」


hd